Сенаттың Қаржы және бюджет комитетінің депутаттары «Зейнетақы жүйесінің қаржылық тұрақтылығын нығайту. Зейнетақы аннуитетін дамыту» тақырыбына арналған дөңгелек үстел отырысын өткізді.

Комитет төрағасы Сұлтанбек Мәкежанов отырысты аша келіп, Қазақстанның зейнетақы жүйесі бүгінде тұрақты жағдайды көрсетіп отырғанын, алайда болашақ демографиялық және экономикалық қауіп-қатерге уақтылы бейімделуді талап ететінін атап өтті.

«Алдағы жылдары зейнетақы жүйесіне ауыртпалық арта түседі. Бала туу және өмір сүру ұзақтығының артуы демографиялық қысымды күшейтеді, ал инфляциялық процестер зейнетақы жинақтарының сақталуына әсер етеді. Сондықтан зейнеткерлік жастағы азаматтардың лайықты өмір сүру деңгейін қамтамасыз етуге бағытталған жүйелі шешімдерді әзірлеу және алдын ала әрекет ету аса маңызды», - деп атап өтті Сұлтанбек Мәкежанов.

Еңбек және халықты әлеуметтік қорғау министрі Асқарбек Ертаев өз сөзінде жүргізіліп жатқан жаңғырту жұмыстары мен базалық төлемдерді кезең-кезеңімен арттыруға қарамастан, қолданыстағы зейнетақы жүйесі жоғалған табысты алмастырудың жеткілікті деңгейін әлі де толық көлемде қамтамасыз етпейтінін атап өтті. Оның айтуынша, азаматтардың әртүрлі санаттары арасында зейнетақымен қамсыздандыруда айырмашылықтар сақталуда. Сондай-ақ халықты зейнетақы жинағымен қамтуды арттыру және ұзақ мерзімді жинақ мәдениетін қалыптастыру өзекті міндет болып қала береді.

Зейнетақы активтерін басқару мәселелеріне ерекше назар аударылды. Ұлттық Банктің ақпараты бойынша Бірыңғай жинақтаушы зейнетақы қоры активінің көлемі 25,9 трлн теңгеге жетті. Бұл ретте ұзақ мерзімді келешекте оң кірісті нақты жағдай қамтамасыз етіледі. Инвестициялық портфельді әртараптандыру және кірістілігі жоғары құралдарды кеңейту басым міндеттердің қатарында белгіленіп отыр.