Семейде Tomorrow School жасанды интеллект мектебі ашылды

Бүгін, 17:04 Думан Кенжеғазыұлы

Семейде өңірдегі алғашқы жасанды интеллект мектебі – Tomorrow School Semey ашылып, алғашқы қатысушылар оқуын бастады.

Іс-шараға Абай облысы цифрлық технологиялар басқармасының басшысы Абзал Серікұлы, Alikhan Bokeikhan University ректоры Александр Койчубаев, Shakarim University проректоры Бейімбет Дәрібаев, Абай облысының жастар саясаты мәселелері басқармасының басшысы Олжас Бейсенбаев, облыстық білім басқармасының басшысы Айжан Құрманова және мектептің алғашқы қатысушылары қатысты.

Абай облысы цифрлық технологиялар басқармасының басшысы Абзал Серікұлы жаңа мектептің өңір үшін маңызына тоқталды.

– Мемлекет басшысының Жарлығымен 2026 жыл елімізде Цифрландыру және жасанды интеллект жылы деп жарияланды. Tomorrow School Semey – өңіріміздегі алғашқы жасанды интеллект мектебі. Мұнда жастар бағдарламалау мен жасанды интеллектіні меңгеріп, өз идеяларын нақты жобаға айналдыра алады. Алғашқы қатысушылардың арасынан өңіріміздің цифрлық дамуына үлес қосатын жаңа мамандар шығады деп сенемін, – деді Абзал Серікұлы.

Шара барысында мектепке бірінші болып тіркелген Роза Әубәкіроваға планшет табысталды. 40 жастағы Роза IT мен жасанды интеллект саласына бұрыннан қызыққан. Алайда ақылы оқу мүмкіндігі болмағандықтан, осы бағытта білім алуды кейінге қалдырып келген.

– Жасанды интеллект пен IT саласына бұрыннан қызығатынмын. Бірақ ақылы оқу болғандықтан, білім алу арман болып жүрді. Енді тегін оқуға мүмкіндік туғанына өте қуаныштымын. Алғаш тіркелген қатысушы ретінде планшет алу да күтпеген сый болды. Оқуымыз сәтті басталып, мақсаттарымызға жетеміз деп сенемін, – деді Роза Әубәкірова.

Tomorrow School Semey мектебіне барлығы 230 өтінім түскен. Тіркеу мен бағалау қорытындысында 85-ке жуық адам іріктеуден өтіп, қабылданды.

Мектептің оқу тәсілі өзгеше. Мұнда дәстүрлі дәріс те, сабақ беретін мұғалім де жоқ. Оқу peer-to-peer, яғни қатысушылардың бір-бірінен үйренуі қағидатына құрылған. Олар практикалық тапсырмаларды өздігінен орындайды, тәжірибе алмасады, топта жұмыс істейді және нақты міндеттердің шешімін іздейді.

Tomorrow School Semey өңір жастарына IT мен жасанды интеллектіні тегін меңгеруге жол ашады. Бұл – цифрлық саланы таңдаған жастар үшін білім алып қана қоймай, өз идеясын жүзеге асыруға берілген жаңа мүмкіндік.

Тағыда оқыңыз

Мемлекет басшысы Қасым-Жомарт Тоқаевтың Қазақстан халқына жолдауы «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу»Shakarim AI Check «Академиялық адалдық» аталымы бойынша жеңімпаз атанды Tomorrow School IT саласындағы жаңа буын мамандарды дайындайтын орта Мемлекет басшысы Қасым-Жомарт Тоқаевтың Ұлттық құрылтайдың төртінші отырысында сөйлеген сөзі Мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауы

Бізге ақпарат жолдаңыз Телеграмдағы каналымыз

Семейде Tomorrow School жасанды интеллект мектебі ашылды

Пікірлер (0)