Жеке куәлік пен паспорт алу, автокөлікті тіркеу, жылжымайтын мүлікке меншік құқығын рәсімдеу – Абай облысы тұрғындары халыққа қызмет көрсету орталықтарында (ХҚКО) жиі жүгінетін қызметтердің қатарында. 2026 жылдың сегіз айында өңірдің ХҚКО-лары арқылы осы және басқа да бағыттар бойынша мемлекеттік қызметтер көрсетілді.

Өңірде ең көп сұранысқа ие қызметтердің бірі – жеке басты куәландыратын құжаттарды беру және ауыстыру. Есепті кезеңде тұрғындарға паспорттар мен жеке куәліктерді рәсімдеу бойынша шамамен 5,3 мың қызмет көрсетілді. Азаматтар бұл қызметке құжаттың жарамдылық мерзімі аяқталғанда, белгіленген жасқа толғанда, жеке деректері өзгергенде немесе құжатын жоғалтқан жағдайда жүгінеді.

Сұраныс бойынша келесі орында көлік құралдарын тіркеу қызметтері тұр. Сегіз айда өңірде шамамен 4,2 мың автокөлік тіркелді. Сонымен қатар ХҚКО-ларда көлікті қайта тіркеу және оның тіркеу деректеріне өзгерістер енгізу қызметтері де қолжетімді.

Жылжымайтын мүлікке қатысты қызметтер де тұрғындар арасында сұранысқа ие. Атап айтқанда, есепті кезеңде жылжымайтын мүлікке құқықтар мен ауыртпалықтарды мемлекеттік тіркеу бойынша шамамен 2,8 мың қызмет көрсетілді. Бұл рәсім тұрғын үйді немесе өзге де жылжымайтын мүлікті сатып алу, сату, сыйға тарту және мұраға алу кезінде қажет.

Бұдан бөлек, жүргізуші куәлігін алу қызметіне де сұраныс бар. Жыл басынан бергі сегіз айда өңір тұрғындарына шамамен 900 жүргізуші куәлігі берілді. Сондай-ақ Қазақстан Республикасы Ұлттық куәландырушы орталығының тіркеу куәлігін беру және кері қайтарып алу бойынша шамамен 400 өтініш тіркелді.

Өтініштердің басым бөлігі Семей қаласына тиесілі. Қаладағы халыққа қызмет көрсету орталықтарының ішінде №2 ХҚКО тұрғындар жиі жүгінетін орталықтардың бірі саналады. Мұнда азаматтар жеке құжаттарын рәсімдеп, көлік құралдарын тіркеуге, жылжымайтын мүлікке қатысты және басқа да мемлекеттік қызметтерді алуға мүмкіндік алады.