«Феррум Контракт» табиғи-минералды су өндіру компаниясы Kaizen үнемді өндіріс жүйесін енгізді. Кәсіпорынның еңбек өнімділігін арттыруға жұмсалған шығындарының 14 млн теңге көлеміндегі бір бөлігін «QazIndustry» Қазақстандық индустрия және экспорт орталығы» АҚ өтеді.

«Феррум Контракт» өкілдерінің айтуынша, белгілі жапондық тәжірибені енгізу кәсіпорында оң нәтижесін беруде. Зауыт қызметкерлері шикізатты үнемдеуді үйреніп, ең бастысы - су мен электр энергиясының шығыны азайған.

«Феррум Контракт» ЖШС табиғи-минералды су өндіру және құюмен айналысады. Зауыт Батыс Қазақстан облысы Тасқала ауданы Бірлік ауылында орналасқан. Өндірісте 14 адам жұмыс істейді.

Кәсіпорын сағатына 0,5 литрлік 2000, бір литрлік 1000 және 1,5 литрлік 700 бөтелке шығарады.

Kaizen бойынша жұмыс нәтижелерін талдау барысында техникалық суды қайта пайдалану бойынша да оң нәтижелер анықталды. Ол резервуарлар мен үлкен бөтелкелерді жуу үшін қолданылады. Жазда мұндай су ағаштарды суару үшін пайдаланылады, бұл оны тұтынуды азайтуға және коммуналдық шығындарды үнемдеуге мүмкіндік береді.

Естеріңізге сала кетейік, QazIndustry кәсіпорындардың шығындарының бір бөлігін өтеу түрінде өнеркәсіпті ынталандыру бойынша қызметтер көрсетеді. Шығындар еңбек өнімділігін арттыруға немесе өнімді ішкі нарыққа ілгерілетуге бағытталған болуы тиіс.

Мысалы, өнеркәсіптік кәсіпорындар қызметкерлердің құзыретін арттыруға, технологиялық процестерді жетілдіруге, цифрлық технологияларды енгізуге, шығарылатын өнімге сертификаттық және зертханалық сынақтар жүргізуге, сертификаттарды тіркеуге және т.б. бағытталған шығындарды өтей алады.