ҚР Парламенті Сенатының депутаттары Дархан Қыдырәлі мен Ғалиасқар Сарыбаев Азық-түлік қауіпсіздігі жөніндегі Ислам Ұйымының штаб-пәтерінде болды.

Депутаттар ұйымның Бас директоры Берік Арынмен кездесті және АҚИҰ жұмысының негізгі бағыттарымен танысты. Кездесу барысында Ұйым қызметінің негізгі бағыттары, сондай-ақ ұйымның институционалдық дамуын қолдаудағы және оның халықаралық ұстанымдарын нығайтудағы Сенаттың рөлі талқыланды.

Сенаторларға АҚИҰ-ның Қазақстан мен Орталық Азия өңірінде іске асып жатқан бірегей бастамалары таныстырылды. Оның ішінде Астанада Халықаралық Бас банк құру, агроинновациялар мен цифрлық шешімдерді енгізу, сондай-ақ АҚИҰ 7-ші Бас Ассамблеясын өткізуге дайындық туралы айтылды.

Сенаторлар АҚИҰ-ны заңнамалық деңгейде одан әрі қолдаудың маңыздылығын және Ислам ынтымақтастығы ұйымы елдерінде тұрақты азық-түлік жүйесін қамтамасыз ету жөніндегі бірлескен қадамдардың қажеттілігін атап өтті.

«АҚИҰ азық-түлік қауіпсіздігі саласындағы халықаралық ынтымақтастықты дамытуға елеулі үлес қосып келеді. Біз Сенат депутаттары ретінде ұйымның күш-жігерін қолдауға және өңірдің және одан тысқары жерлердің тұрақты дамуы үшін әріптестік байланыстарды нығайтуға дайынбыз», - деп атап өтті Дархан Қыдырәлі.