Қазақстан Республикасы Президентінің Қазақстан халқына Жолдауында көтерілген міндеттер еліміздің қорғаныс саласы үшін де маңызды. Әскери бөлім командирі ретінде менің пайымдауымша, қуатты әскер қалыптастыру үшін жауынгерлік даярлықпен қатар, әскери қызметшілердің әлеуметтік жағдайын жақсарту, заманауи технологияларды енгізу және әскери тәртіпті нығайту қажет.

Бүгінде әскери инфрақұрылымды дамыту бағытында маңызды жұмыстар атқарылуда. Жаңа казармалар, тұрғын үй нысандары мен басқа да әскери объектілердің салынуы сарбаздардың тұрмыс сапасын арттыруға және әскери қызмет өткеруіне қолайлы жағдай жасауға бағытталған. Өйткені әскери қызметшіге қамқорлық көрсету – ел қорғанысын нығайтудың маңызды кепілі.

Сонымен қатар, әскери саланы цифрландыру – уақыт талабы. Заманауи цифрлық технологияларды оқу-жаттығу үдерісінде тиімді пайдалану, құжат айналымын оңтайландыру және әскери қызметшілердің цифрлық сауаттылығын арттыру қызмет сапасын жақсартуға мүмкіндік береді. Цифрландырудың басты мақсаты – басқару тиімділігін арттырып, уақыт пен ресурстарды үнемдеу, жауынгерлік даярлықтың сапасын жетілдіру. Бұл жұмыстар әскери құпияны сақтау және ақпараттық қауіпсіздік талаптарын қатаң ескере отырып жүргізілуі тиіс.

Тағы бір маңызды бағыт – заң мен тәртіпті сақтау. Әскери ортада заңдылықты нығайту, әскери жарғылардың талаптарын орындау, құқық бұзушылықтардың алдын алу және жеке құрамның жауапкершілігін арттыру басты назарда болуы керек. Командирдің жеке үлгісі, әділдік пен талапшылдық әскери ұжымдағы тәртіп пен сенімді қалыптастырады.

Менің ойымша, әскердің күші тек қару-жарақпен немесе әскери техниканың мүмкіндігімен өлшенбейді. Оның басты тірегі – тәртіпті, білімді, рухы мықты және әлеуметтік жағынан қорғалған әскери қызметші. Сондықтан алдағы уақытта әскери инфрақұрылымды дамытуға, цифрлық технологияларды енгізуге, жауынгерлік даярлықты жетілдіруге және заң мен тәртіпті нығайтуға басымдық беруіміз қажет.

Отанға адал қызмет етуге қолайлы жағдай жасау, заманауи технологияларды игеру және әскери тәртіпті сақтау – еліміздің қорғаныс қабілетін арттырудың негізгі бағыттары.