Премьер-министр Олжас Бектеновтің төрағалығымен өткен Үкімет отырысында алдағы жылыту маусымына дайындық барысы туралы мәселе қаралды. Онда өнеркәсіп және құрылыс министрі Ерсайын Нағаспаев әлеуметтік сала нысандарын, тұрғын үй қорын және инженерлік инфрақұрылымды дайындау бойынша баяндама жасады.

Министр бүгінде барлық өңірде алдағы жылыту маусымына дайындық жұмыстары жүргізіліп жатқанын мәлімдеді. Қазіргі уақытта білім беру нысандарының дайындығы 92%-ды құрап отыр. Жоспардан қалып отырған 3 өңір бар: олар – Алматы, Қостанай және Қарағанды облыстары. Денсаулық сақтау нысандары бойынша да осындай  жағдай қалыптасып отыр. Дайындық 91%-ды құрайды, яғни бүгінгі таңда  5,7 мыңнан астам нысанның шамамен 5,2 мыңы маусымға дайын. Алайда, төмен көрсеткіштер Қарағанды, Алматы және Қостанай облыстарында байқалуда.

Тұрғын үйлер бойынша жылыту маусымына дайындық жұмыстары 43,2 мың үйде аяқталды, бұл жоспардың 83%-ын құрайды. Шымкент қаласында, Жамбыл және Қостанай облыстарында тұрғын үйлердің дайындық деңгейі төмен.

«Өңірлерде инженерлік инфрақұрылым бойынша да жөндеу жұмыстары жүргізілуде. Сумен жабдықтау желілерінің 973 шақырымының 610 шақырымы жөнделген.  Су бұру желілері 172 шақырымының шамамен 100 шақырымы жөнделді. Төмен көрсеткіштер Алматы қаласында, Ұлытау, Қостанай, Маңғыстау облыстарында орын алып отыр», — деді Ерсайын Нағаспаев.

Сонымен қатар жылыту маусымының тұрақты өтуі мақсатында автономды қазандықтардың дайындығына мониторинг жүргізілуде. Әкімдіктердің мәліметі бойынша, бүгінде 11,2 мың автономды қазандық жылыту маусымына дайын, бұл еліміз бойынша 85%-ды құрайды.

Министр автономды қазандықтар үшін көмір қоры 51%-ға дайындалғанын, мазут қоры 91%-ға, дизель отыны 39%-ға дайын екенін жеткізді.

 Алдағы жылыту маусымына уақтылы дайындықты қамтамасыз ету мақсатында әкімдіктер:

- 1 қыркүйекке дейін білім беру нысандарының толық дайындығын және 15 қазанға дейін денсаулық сақтау, тұрғын үй-коммуналдық шаруашылық және тұрғын үй қоры нысандарының дайындығын қамтамасыз ету;

- сонымен қатар қыркүйектің соңына дейін сумен жабдықтау және кәріз жүйелерінде жөндеу жұмыстарын аяқтау;

- және орталық, солтүстік, шығыс өңірлер мен елордада 15 қыркүйекке дейін, ал қалған өңірлерде 15 қазанға дейін жылыту маусымына толық дайындықты қамтамасыз ету қажет.

«Аталған бағыттағы жұмыстар  Министрліктің қатаң  бақылауында болады», — деп түйіндеді сөзін министр.