Абай облысында Қазақстан Республикасы Конституциясының 30 жылдығына арналған кең ауқымды дөңгелек үстел өтті.

Іс-шара Абай облысының жастар саясаты мәселелері жөніндегі басқармасының қолдауымен, «СОЦkz» қоғамдық қорының ұйымдастыруымен өткізілді.

Дөңгелек үстелдің негізгі мақсаты – Ата Заңымыздың тарихи мәнін айшықтап, қоғамда құқықтық мәдениетті нығайту, сондай-ақ жастардың азаматтық белсенділігі мен құқықтық сауаттылығын арттыру.

Іс-шараға өңірдің барлық санаттағы жастары, мемлекеттік мекемелер мен білім беру ұйымдарының өкілдері, заңгерлер, сарапшылар және қоғам белсенділері қатысты.

Шараны алғашқы болып Семей қаласының құрметті азаматы — Шәріпбаев Оралғазы Тоқтарұлы ашып, жастарға жүрекжарды лебізін білдіріп, іс-шараның маңыздылығын атап өтті.

Бұдан кейін сөз Абай облысы бойынша Қазақстан халқы Ассамблеясы ақсақалдар кеңесінің төрағасы, еңбек ардагері, ҚР білім саласының құрметті қызметкері Сартаев Оралхан Иманғалиұлына берілді. Ол өз баяндамасында Конституцияның мемлекет тұрақтылығындағы, халықтар бірлігіндегі және ұрпақ тәрбиесіндегі орны ерекше екенін атап өтті.

Абай облысы Қорғаныс істері жөніндегі департамент бастығының орынбасары, подполовник Шәріпханов Қанат Қабдығаләмұлы «Қызметтен мүмкіндіктерге: мерзімді әскери қызметтің болашаққа жол ашуы» тақырыбында баяндама жасап, жастарды елге қызмет ету арқылы дамуға үндеді.

ҚР Әділет министрлігі Абай облысының Әділет департаменті құқықтық түсіндіру жұмысы және заң қызметтерін көрсету бөлімінің басшысы м.а. Қасымов Абылайхан Мұратұлы «ҚР Конституциясына 30 жыл: жастардың құқықтық мәдениеті – қуатты мемлекеттің негізі» тақырыбында сөз сөйлеп, жастардың құқықтық сауаттылығы – мемлекет болашағы екенін атап өтті.

Абай облысы білім басқармасы басшысының орынбасары Құрмашева Айжан Абзалиқызы «Адал азамат» біртұтас тәрбие бағдарламасы аясында парасаттылық пен адалдықты қалыптастыру» тақырыбында баяндама жасап, жас ұрпаққа тәрбиенің мәні туралы ой қозғады.

Alikhan Bokeikhan University мемлекеттік-құқықтық пәндер кафедрасының аға оқытушысы, заңгер, құқық магистрі Бақтыбеков Мұхтар Бақтыбекұлы құқықтық білім беру мен конституциялық тәрбие жөнінде ғылыми көзқарас ұсынды.

Іс-шара аясында жастар тарапынан мазмұнды сұрақтар қойылып, спикерлер тарапынан нақты жауаптар берілді. Бұл диалог жастардың елдің құқықтық өміріне қызығушылығын арттырған маңызды сәт болды.

Іс-шара соңында белсенді қатысушылар мен спикерлерге құрмет көрсетілді.

Абай облысы әкімінің орынбасары — Мейірлан Ақылбекұлы Раханов спикерлерге алғыс хат табыстады.

Сонымен қатар, жастардың белсенділігі мен шараға қосқан үлесі үшін Абай облысының жастар саясаты мәселелері жөніндегі басқармасының басшысы — Олжас Түсіпбекұлы Бейсенбаев белсенді қатысушыларды алғыс хаттармен марапаттады. 

Қазақстан Республикасы Конституциясының 30 жылдығы — бұл тек тарихи меже ғана емес, Тәуелсіз Қазақстанның даму жолындағы ең басты құндылықтар мен қағидаттарды жаңаша ұғынуға мүмкіндік беретін маңызды кезең.

Бұл дөңгелек үстел — құқықтық мемлекет құрудағы жастардың рөлін күшейтуге, азаматтық белсенділікті дамытуға және құқықтық мәдениетті ілгерілетуге бағытталған мазмұнды диалог алаңы болды.