Бүгін, 11 сәуірде, Әділет министрлігі ЦДИАӨМ-мен бірлесіп, азаматтарға нотариаттық қызметтер алуды айтарлықтай жеңілдетуге мүмкіндік беретін «Цифрлық нотариат» атты жаңа жобаны таныстырды. Енді қазақстандықтар сенімхаттарды электронды түрде рәсімдей алады.

Қазақстан нотариаттық қызметтің осы түрін цифрлық форматқа ауыстырған әлемдегі алғашқы мемлекеттердің бірі болды. Бүгінгі таңда онлайн режимде тек Франция мен Литвада ғана сенімхатты нотариалды куәландыруға болады.

ҚР әділет министрі Азамат Есқараев жобаны Мемлекет басшысының тапсырмасы бойынша Үкіметтің «цифрлық» бастамалары аясында (сондай-ақ Digital Justice жобалар портфелі шеңберінде) Әділет, Цифрлық даму, инновациялар және аэроғарыш өнеркәсібі министрліктері Республикалық нотариаттық палатамен бірлесіп іске қосқанын атап өтті.

«Мемлекет басшысы Қасым-Жомарт Кемелұлы Тоқаев Сайлауалды бағдарламасында Е-gov мобильді қосымшасының базасында мемлекеттің халықпен және бизнеспен өзара іс-қимылы үшін тиісті цифрлық инфрақұрылым құру қажеттігі туралы айтқан болатын. Бүгінгі “Цифрлық нотариат” жобасы – осы бағыттағы жұмыстардың бірі. Біз алдағы уақытта да мемлекеттік органдармен бірлесіп, қазақстандықтардың өмірін жеңілдету бойынша пайдалы жобаларды жүзеге асыруды жалғастырамыз», — деді цифрлық даму, инновациялар және аэроғарыш өнеркәсібі министрі Бағдат Мусин.  

Азамат Есқараевтың айтуынша, егер бұрын сенімхатты рәсімдеу кезінде құжатқа қол қою және нотариустың куәландыруы үшін клиенттің келуі талап етілсе, енді нотариаттық сенімхат азаматтарға eGov Mobile арқылы қолжетімді болып отыр. Ал болашақта бұл қызмет бірқатар банк қосымшасында пайда болмақ. «Цифрлық сенімхат» онлайн режимде клиент пен нотариустың бейнебайланысы арқылы рәсімделеді.

Цифрлық сенімхатты алу үшін:

1. eGov Mobile қосымшасына кіру;

2. өтінішті толтырып, оған ЭЦҚ арқылы қол қою; 

3. мәліметтерді растау үшін қосымшадан нотариусқа бейнебайланыс арқылы қоңырау шалу;

4. белгіленген тариф бойынша нотариус қызметін төлеу;

5. «Цифрлық құжаттар» бөлімінде цифрлық сенімхатты алу керек. 

Бұл қызметті өтініш берілген сәтте бос кез келген нотариус көрсете алады. Цифрлық сенімхатты барлық мемлекеттік органда немесе талап етілген ұйымдарда қағаз құжат сияқты ұсынуға болады.

Ал қауіпсіздікті қамтамасыз ету мақсатында eGov Mobile қосымшасына кіру кезінде де, өтінімге қол қою кезінде де пайдаланушының биометриялық деректерін қолдана отырып, ЭЦҚ пайдаланылады.