Жалған ақпаратқа қарсы іс-қимыл орталығы жалған ақпаратты анықтау, талдау және бейтараптандыру бойынша төрт ай бойы жүргізілген жүйелі жұмыстың нәтижелерін қамтитын жаңа шығарылымды ұсынды. Материалда көп жағдайда көзге түсе бермейтін үдерістер ашылып, еліміздің ақпараттық кеңістігін кешенді қорғаудың қалай ұйымдастырылатыны көрсетілген.

Орталық алғашқы күннен бастап азаматтардың денсаулығына, қауіпсіздікке және мемлекет қабылдайтын әлеуметтік маңызы бар шешімдерге қатысты таралатын жалған енгізілімдерге жедел әрекет етіп, үздіксіз мониторинг жүргізіп келеді. Есепті кезеңде ондаған жалған хабарламалар талданып, 24 ресми теріске шығару жарияланды, 14 тақырыптық шығарылым әзірленді және 17 телеэфир өткізілді. Орталықтың материалдары ұлттық және халықаралық бұқаралық ақпарат құралдарында жүзден астам рет жарияланып, оның сараптамасына деген жоғары сенімді және практикалық маңызын дәлелдеді.

Шығарылымның маңызды бөлігі Орталықтың күнделікті жұмыс үдерістеріне арналған. Күн сайын мемлекеттік органдармен өзара іс-қимыл жүзеге асырылады, ақпараттық тәуекелдер бойынша консультациялар өткізіледі, коммуникациялық тәсілдер әзірленеді және болжамдық-талдамалық зерттеулер жүргізіледі. Сонымен қатар жекелеген фейктердің не себепті жария кеңістікке шығарылмайтыны да түсіндірілген.

Фейктермен күрес – Орталық қызметінің бір бағыты ғана. Басымдық алдын алу шараларына, ақпаратты сыни тұрғыда қабылдау дағдыларын дамытуға және қоғамның ақпараттық тұрақтылығын күшейтуге беріледі.

Осылайша, жаңа шығарылым Орталық қызметіне жан-жақты көзқарас ұсынып, нақты жұмыс процестерін, негізгі сын-қатерлерді және азаматтардың шынайы ақпаратқа қол жеткізу құқығын қорғауға бағытталған тәсілдерді толыққанды көрсетеді.