Қарағандыда «Талдау мектебі. Қарағанды» білім беру бағдарламасының қорытынды жобаларын қорғау өтті. Шара барысында жас мамандар өңірлік дамудың негізгі бағыттары бойынша өздерінің аналитикалық шешімдерін таныстырды. Курс тыңдаушылары алдында Қазақстан Республикасы Парламенті Сенаты Төрағасының орынбасары Жақып Асанов та сөз сөйледі. Ол өз дәрісінде қазіргі мемлекеттік басқару жүйесіндегі аналитиканың және жобалық басқарудың рөлі туралы айтып берді.

Сенаттың Вице-Спикері жобалық басқару - бытыраңқы бастамаларды түсінікті әрі қолжетімді нәтижелерге айналдыратын негізгі құрал екенін атап өтті. Оның айтуынша, кез келген жоба төрт элементтен басталады: мақсат, мерзім, команда және ресурстар. Осылардың біреуі болмаса, процесс басқару мүмкіндігін жоғалтады және нәтиже бермейді.

«Жобалық басқару - бұл есептер немесе формалды рәсімдер емес, нақты өзгерістерге жетелейтін құрал», - деді Жақып Асанов.

Жүйелі өзгерістер тақырыбын жалғастыра отырып, дәріскер ұйымдық құрылымның басқарушылық шешімдердің жылдамдығы мен сапасын айқындайтынын атап өтті. Оның сөзінше, кез келген жүйе тек артық процестер жойылып, жауапкершілік логикасы дұрыс құрылып, ең көп құндылық тудыратын негізгі бағыттар күшейтілген кезде ғана ілгерілей бастайды.

«Құрылым - кез келген ұйымның іргетасы. Ол дұрыс құрылғанда жүйе жылдам, түсінікті және тұрақты жұмыс істейді. Ал маңызды учаскелер шамадан тыс жүктелсе немесе әлсіресе, ешқандай реформа нәтиже бере алмайды. Басқару тәртіптен, фокус пен артық дүниелерді алып тастаудан басталады», - деп атап өтті Жақып Асанов.

Осы күні «Талдау мектебі» қатысушылары адами капиталды дамыту, экологияны сақтау, ауылдық аумақтарды ілгерілету, экономика және білім беру мәселелеріне арналған аналитикалық баяндамаларын таныстырды. Әр команда өңірдің қолданбалы міндеттерін шешуге бағытталған жол картасын әзірледі.

«Талдау мектебі. Қарағанды» - өңірде алғаш рет осындай форматта жүзеге асырылған жоба. Бес апта ішінде қатысушылар талдау құралдарын, деректермен жұмыс істеу әдістерін және қолданбалы зерттеулер дайындау тәсілдерін меңгерді.

Бағдарлама қорытындысы бойынша үздік командалар марапатталды. Ұсынылған шешімдер өңірдің тұрақты дамуы үшін аналитикалық мәдениеттің және жобалық ойлаудың қажет екенін айқын көрсетті.