Абайдың 180 жылдық мерейтойы аясында ҚР Ұлттық академиялық кітапханасында Мемлекеттік сыйлықтың лауреаты, әдебиеттанушы Саутбек Абдрахмановтың «Алып Абай. Конгениальность. Congeniality» атты кітабының тұсаукесері өтті.

Бұл кітап тұтастай Абайдың аудармашылық мұрасына арналған тұңғыш еңбек. Кітапта Пушкин, Лермонтов, Крылов, Гете, Байрон, Шиллер, Мицкевич, Бунин, Дельвиг, Полонский секілді әлем әдебиетінің классиктерінен жасалған Абай аудармалары толық қамтылып, бірде-бір өлең назардан тыс қалмаған.

Басылым қазақ, орыс және ағылшын тілдерінде жарық көрді. Кітапта Абай шығармашылығының әлемдік әдебиетпен үндестігі, көркемдік табиғаты мен рухани миссиясы жан-жақты зерделенген.

Іс-шараға мемлекет және қоғам қайраткерлері, Сенат және Мәжіліс депутаттары, ҚР Мәдениет және ақпарат министрлігінің өкілдері, зиялы қауым, танымал қаламгерлер, абайтанушылар, оқытушылар мен студенттер қатысты.