Сыбайлас жемқорлық – кез келген мемлекеттің әлеуметтік, экономикалық және саяси дамуын тежейтін қауіпті құбылыс. Ол қоғамның сеніміне сызат түсіріп, мемлекеттік институттардың тиімділігіне нұқсан келтіреді. Сондықтан жемқорлыққа қарсы күрес – тек мемлекеттік органдардың міндеті емес, бүкіл қоғамның ортақ жауапкершілігі.

Бүгінде Қазақстанда осы бағытта нақты өзгерістер жасалуда. Заңнаманың күшеюі, мемлекеттік қызметтің ашықтығын арттыру, цифрландыру – жемқорлық тәуекелдерін барынша азайтуға мүмкіндік беріп отыр. «Ашық бюджет», «E-licensing», «E-gov» сияқты электронды платформалар мемлекеттік қызмет көрсетудің айқын әрі қолжетімді болуына жол ашты. Бұл өз кезегінде адам факторын азайтып, әділдікке негізделген басқару мәдениетін қалыптастырады.

Жемқорлықпен күрестің маңызды бөлігі – қоғамның құқықтық санасын көтеру. Адалдық, әділдік, жауапкершілік сияқты құндылықтарды дәріптеу мектептен бастап барлық білім беру ұйымдарында жүргізілуі тиіс. Әсіресе, жас буын жемқорлыққа қарсы иммунитет қалыптастырудың негізгі тірегі.

Сыбайлас жемқорлықпен күресте азаматтық қоғам институттарының да рөлі күшті. БАҚ, қоғамдық ұйымдар, еріктілер қозғалысы – мемлекеттік шешімдердің ашықтығын бақылауда маңызды орын алады.

Жалпы, жемқорлықты жою – ұзақ мерзімді, жүйелі жұмысты талап ететін күрделі үрдіс. Бірақ қоғамның бірлескен күш-жігері, әділдікке негізделген орта қалыптастыру жолындағы табандылығы ғана мемлекет дамуының берік іргетасын қалайды.