Берік Уәли оқушыларға сүйінші жаңалығын жеткізді

Бүгін, 13:31 Думан Кенжеғазыұлы

«Дарындыға дархан жол» жобасы аясында өткен кездесуге халықаралық және республикалық зияткерлік олимпиадалардың, шығармашылық конкурстардың, спорттық жарыстар мен чемпионаттардың 61 жеңімпазы мен жүлдегері қатысты.

Облыс әкімі Берік Уәли кездесу алдында оқушылардың жобалары мен жетістіктері ұсынылған көрмені тамашалады. Көрмеде «роботехника» бағыты бойынша колледждер мен мектептердің жеңімпаз жобалары, ғылыми жобалар байқауларының үздіктері, сондай-ақ Х халықаралық әскери-патриоттық «Айбын» жастар жиынының жүлдегерлері, дарынды балаларға арналған Ш.Уәлиханов атындағы «Жас Ұлан» арнайы ерлер мектеп-лицей-интернатының оқушыларының жетістіктері ұсынылды.

Еркін форматта өткен кездесуде облыстың дарынды оқушылары жетістіктері мен алдағы мақсаттары туралы айтып, ойлары мен ұсыныстарын ортаға салды. Аймақ басшысы сөз сөйлеген әрбір қатысушыны мұқият тыңдап, ақыл-кеңесін берді.

«Бүгін мен сендерге алдыңғы буынның шын пейілін айтқым келеді: сендер – біздің өңірдің ең үлкен үміті, ең үлкен сенімісіңдер. Біз сендермен мақтанамыз. Бұл залда талантымен де, еңбегімен де биікке көтерілген жас көшбасшылар отыр. Мемлекет басшысы Қасым-Жомарт Кемелұлы Тоқаев «Елімізде жүзеге асырылып жатқан әрбір бастама, ең алдымен, сіздерге арналады. Қазіргі реформалардың игілігін көретін де, елдік істерді жалғастыратын да – сіздер» деген еді. Сендер олимпиадаларда, жобаларда, жарыстарда жеңіске жетіп қана қоймай, жаңа идеяларға жол ашып, үлкен жауапкершілікті арқалап жүрсіңдер. Біз бүгін ресми жиынға емес, шынайы әңгімелесу үшін жиналдық. Ойларың, сұрақтарың, ұсыныстарың – біз үшін маңызды. Өйткені талантты жастарға өз әлеуетін туған жерінде жүзеге асыруға жағдай жасау – барлығымыздың ортақ міндетіміз. Осы орайда биылғы оқу жылының соңында халықаралық олимпиаданың жүлдегерлеріне, яғни 18 оқушыға облыс әкімінің атынан қомақты сомадағы стипендия тағайындалатынын да қуанышпен хабарлағым келеді. Бұл білімге құштар, талапты жастарға үлкен мотивация болары сөзсіз», – деді аймақ басшысы.

Шараға қатысқан оқушыларға облыс әкімінің атынан ақшалай сертификаттар табысталды.

Айта кетейік, 2025 жылы Абай облысының оқушылары халықаралық және республикалық олимпиадалар мен байқауларда 277 медаль жеңіп алды. Олардың қатарында Халықаралық математика және информатика пәндерінен Әл-Харезми олимпиадасы, жасөспірімдер арасындағы халықаралық жаратылыстану-ғылыми олимпиадасы (IJSO), математика, информатика, физика және химия пәндері бойынша «Туймаада» халықаралық олимпиадасы, Ө.Жолдасбеков атындағы математика және механика бойынша зерттеу жобаларының халықаралық конкурсы, сондай-ақ халықаралық әскери-патриоттық «Айбын» жастар жиыны бар.

Тағыда оқыңыз

Мемлекет басшысы Қасым-Жомарт Тоқаевтың Ұлттық құрылтайдың «Адал адам – Адал еңбек – Адал табыс» атты үшінші отырысында сөйлеген сөзі Мемлекет басшысы Қасым-Жомарт Тоқаевтың Ұлттық құрылтайдың төртінші отырысында сөйлеген сөзі Қасым-Жомарт Тоқаев: «Мақсатым – экономиканы және егемендікті нығайту»Мемлекет басшысы Қасым-Жомарт Тоқаевтың Қазақстан халқына жолдауы «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу»Қасым-Жомарт Тоқаев: Біз озық ойлы ұлт ретінде тек қана алға қарауымыз керек

Бізге ақпарат жолдаңыз Телеграмдағы каналымыз

Берік Уәли оқушыларға сүйінші жаңалығын жеткізді

Пікірлер (0)