Қазақстанда қазақстандық тауар өндірушілердің Бірыңғай тізілімін іске қосу бойынша ауқымды жұмыс жалғасып жатыр. Бұл — отандық кәсіпорындарды қолдауға, нақты өндірісті дамытуға және ішкі нарықта ашық әрі әділ ережелер қалыптастыруға бағытталған маңызды құрал.

Осы тізілімге енгізілген кәсіпорындардың бірі — «Өскемен арматура зауыты» АҚ. Бұл — елдегі құбыр арматурасын шығаратын ең ірі әрі тәжірибелі зауыттардың бірі.

«Бірыңғай тізілім — бұл жай ғана цифрлық база емес. Бұл — өнеркәсіпке деген жаңа көзқарас. Ашық, әділ және нақты өндірісті қолдайтын жүйе. Тізілімге ену біз үшін мемлекеттің сенімі мен еңбегімізге берілген баға», — дейді зауыт басшылығы.

Кәсіпорын өкілдерінің айтуынша, тізілім ірі инфрақұрылымдық жобалар іске асырылып жатқан кезеңде ерекше маңызды. Себебі мұндай жобаларда жабдықтардың сапасы, сенімділігі және шығу тегі нақты расталған болуы қажет.

«Мұнда бастысы — біреумен күресу емес, баршаға ортақ, түсінікті ережелер қалыптастыру. Өнімнің шығу тегі анық болғанда, тапсырыс беруші үшін де, өндіруші үшін де сенім артады, ал нарық тұрақты болады», — деп атап өтеді компанияда.

2026 жылдан бастап Бірыңғай тізілімге толық көшу бизнестің пікірінше, өнімнің отандық екендігін ашық растауға, адал өндірушілерді қорғауға және тең бәсекелестік орта қалыптастыруға мүмкіндік береді.

«Өскемен арматура зауыты» АҚ 50 жылдан астам уақыт бойы Қазақстан аумағында нақты өндіріс жүргізіп келеді. Зауыт мұнай-газ саласына, магистральдық құбыр желілеріне және энергетикаға арналған құбыр арматурасын шығарады. Кәсіпорын заманауи жабдықтарға, білікті мамандарға және ірі жобаларға қатысу тәжірибесіне ие.

«Біз тек өнім шығарып қана қоймаймыз — мемлекетпен және бизнеспен ұзақ мерзімді әріптестік құрамыз. Біз үшін өнеркәсіп саясатының тұрақты, ашық және нақты өндірісті қолдайтын болуы өте маңызды», — дейді зауытта.

Компанияда Бірыңғай тізілімді іске қосу — мемлекеттің жүйелі әрі дәйекті жұмысының нәтижесі екенін атап өтеді. Бұл жұмыс цифрландыруға, ашықтыққа және нақты секторды қолдауға негізделген жаңа өнеркәсіп саясатын қалыптастыруға бағытталған.

«Өскемен арматура зауыты» АҚ алдағы уақытта да өнеркәсіпті дамытуға, маңызды инфрақұрылымның сенімділігін арттыруға және отандық өндірушілердің ішкі нарықтағы орнын күшейтуге бағытталған мемлекеттік бастамаларға қатысуға дайын екенін білдірді.