Халықаралық Bett Show 2026 көрмесі аясында ҚР Ғылым және жоғары білім министрі Саясат Нұрбек Lenovo, Intel, Microsoft және Google сынды әлемнің жетекші технологиялық компанияларының басшылығы мен өкілдерімен бірқатар жұмыс кездесулерін өткізді.

Кездесулер барысында Қазақстанның жоғары және жоғары оқу орнынан кейінгі білім беру жүйесіне заманауи цифрлық шешімдерді, жасанды интеллект технологияларын, сондай-ақ инновациялық білім беру платформаларын енгізу перспективалары талқыланды. Студенттер мен оқытушылардың цифрлық құзыреттерін дамыту, жоғары технологиялық экономика салалары үшін білікті кадрлар даярлау және білім беру инфрақұрылымын кешенді жаңғырту мәселелеріне ерекше назар аударылды.

Тараптар қазақстандық жоғары оқу орындарының қатысуымен бірлескен жобаларды іске асыру мүмкіндіктерін де қарастырды. Олардың қатарында жасанды интеллект құралдарын білім беру және ғылыми-зерттеу үдерістеріне енгізу, университеттерде цифрлық экожүйелерді дамыту, стартап-бастамаларды қолдау, сондай-ақ академиялық орта мен технологиялық компаниялар арасындағы ынтымақтастықты кеңейту мәселелері бар. Практикаға бағдарланған өзара іс-қимылдың маңыздылығы атап өтіліп, оның жаһандық еңбек нарығында сұранысқа ие, бәсекеге қабілетті мамандарды даярлаудағы рөлі ерекше көрсетілді.

Сонымен қатар көрме аясында министр Bett Show 2026 ресми медиа-платформасына сұхбат беріп, онда Қазақстанның білім беру, ғылым және цифрлық трансформация салаларындағы мемлекеттік саясаттың негізгі басымдықтарын таныстырды. Сұхбат барысында жасанды интеллектіні дамыту, білім беру үдерістерін цифрландыру, халықаралық ынтымақтастықты нығайту және елде тұрақты инновациялық экожүйе қалыптастыру бағытындағы стратегиялық міндеттерге тоқталды.

Өткізілген кездесулер әлемнің жетекші технологиялық компаниялары тарапынан Қазақстанмен ынтымақтастыққа деген жоғары қызығушылығын айқындап, елдің жаһандық білім беру және технологиялық кеңістікке белсенді түрде ықпалдасуға ұмтылысын тағы бір мәрте көрсетті.