28 наурыз күні Қазақстан тағы да жаһандық экологиялық қозғалыстың бір бөлігіне айналады. Себебі «Жер сағаты» акциясы өтеді. Бұл күні жергілікті уақыт бойынша сағат 20:30-дан 21:30-ға дейін бүкіл ел бойынша табиғатты ұқыпты пайдалану мәселелеріне назар аударуға бағытталған халықаралық бастама ұйымдастырылады. 2026 жылы акцияның тақырыбы экотуризмді дамытуға арналады.

Дәстүр бойынша, дәл сағат 20:30-да үйлерде, кеңселерде және көшелерде бір сағатқа жарық сөндіріледі. Ғимараттар мен нысандардың сыртқы жарықтандыруы символикалық түрде өшіріліп, тұрғындар табиғи ресурстарды сақтау идеясын қолдай алады.

Жыл сайын бұл акцияға әлемнің 180 елінен 2 миллиардтан астам адам және 7000-нан астам қала қатысады. Биыл акция әлемде 19-рет, ал Қазақстанда 17-рет өткізіледі.

Экологиялық бастамаға Абай облысы да белсенді түрде қосылып отыр. Өңірде акцияға тек тұрғындар ғана емес, ірі кәсіпорындар мен ұйымдар да қатысады. Олардың қатарында «Бақыршық кен өндіру кәсіпорны» ЖШС, «Горняк» старательдер артелі» ЖШС, «Қаражыра» АҚ, «Семей цемент зауыты» ЖШС, «Силикат» ЖШС, «Теплокоммунэнерго» МКК, «АЛЕЛ» қаржы-инвестициялық корпорациясы» АҚ, ЖК «Хазипов Р.С.», «ВостокУгольПром» ЖШС, «Kaz Minerals Aktogay» ЖШС, «Qazaq Astyk Group» ЖШС, «Шығыс Бройлер» ЖШС бар.

Акция аясында өңір кәсіпорындары әкімшілік ғимараттардың сыртқы жарықтандыруын бір сағатқа өшіріп, электр энергиясын тұтынуды азайтуды жоспарлап отыр.

Облыс тұрғындарын осы бастаманы қолдауға шақырады: бір сағатқа жарық пен электр құрылғыларын сөндіріп, Жердің болашағына жауапкершілік танытайық.