ҚР Парламенті Сенатында «Азаматтық қатысу мектебі» білім беру жобасының қатысушыларымен кездесу болды және оның аясында іске асыру қорытындылары шығарылды.

Жоба құқықтық мәдениетті дамытуға, қоғамдық сараптама дағдысын қалыптастыруға және азаматтық қоғам мен мемлекеттік институттар арасындағы өзара іс-қимылды нығайтуға бағытталған. Оған қатысушылар ақырғы кезеңде Сенат депутаты Евгений Болгертпен еліміздің саяси жүйесінің негізгі мәселелерін талқылауға мүмкіндік алды.

Кездесу барысында Қазақстандағы саяси үлгілерді салыстырмалы талдау және оларды бейімдеу тақырыбы бойынша дәріс-пікірталас өтті. Саяси институттарды трансформациялауға, кәсіби Парламенттің тежеу мен тепе-теңдік жүйесіндегі рөліне, сондай-ақ «халық үніне құлақ асатын мемлекет» тұжырымдамасын іске асырудың практикалық тетіктеріне ерекше назар аударылды.

«Бүгінде мемлекеттік институттардың қалай жұмыс істейтінін түсінумен қатар осы білімді іс жүзінде қолдана білу де маңызды. Азаматтарды талқылауға және шешімдер әзірлеуге тарту саяси жүйенің тұрақты дамуының негізгі шарты болып табылады», - деп атап өтті сенатор.

Шара соңында ашық пікірталас өтті. Оның барысында қатысушылар саяси жүйені дамытуға, мәслихаттар жұмысының тиімділігіне және қоғамдық бақылау тетіктеріне қатысты сұрақтар қойды. Тікелей диалог форматы қатысушыларға жоғары заң шығарушы биліктің жұмысы туралы түсінік алуға мүмкіндік берді.

«Азаматтық қатысу мектебі» жобасы қоғамның азаматтық білім беруді дамытуға және еліміздегі қоғамдық-саяси процестерге қатысуға дайын белсенді азаматтарды даярлауға сұраныстың жоғары екенін көрсетті.