Абай облысы аумағында орналасқан асфальтбетон зауыттарына кезең-кезеңімен кешенді тексеру жұмыстары жүргізілуде. Бүгінгі күнге дейін 20 зауыттың 13-і тексерістен өтті.

Тексеру жұмыстарын «Жол активтері сапасының ұлттық орталығы» Абай облыстық филиалының мамандары жүзеге асыруда. Бағалау барысында кәсіпорындардың өндірістік қуаттылығы, технологиялық жабдықтарының жай-күйі, өндірістік процестердің нормативтік талаптарға сәйкестігі, сондай-ақ шикізат пен дайын өнім сапасын бақылау жүйесі жан-жақты сарапталды.

Нәтижесінде тексерілген 13 зауыттың тек біреуі ғана белгіленген талаптарға толық сәйкес келетіні анықталды. Ал қалған 12 зауытта түрлі деңгейдегі сәйкессіздіктер тіркелген.

Қазіргі уақытта қалған 7 зауыт бойынша тексеру жұмыстары жалғасып жатыр.

Анықталған кемшіліктерге байланысты талапқа сай келмеген зауыттардың қызметі мен олардың шығарған өнімдері қатаң бақылауға алынып, барлық олқылықтарды қысқа мерзімде жою міндеті қойылды.