Бүгін Мұғалжар ауданына жұмыс сапары барысында Ақтөбе облысының әкімі Ералы Тоғжанов, Сыбайлас жемқорлыққа қарсы қызмет департаменті басшысының міндетін уақытша атқарушы Есқали Саламатов және Құмжарған ауылының тұрғындары 60 орындық мектептің ашылуына қатысты.

Есқали Саламатов ел Президенті Қазақстан халқына Жолдауында сыбайлас жемқорлықтан тәркіленген қаражатты мектеп салуға бағыттауды тапсырғанын алға тартты.

Аталған тапсырманы орындау мақсатында Қазақстанда алғаш рет Құмжарған ауылында орта мектеп пайдалануға берілді. Оның құрылысына сыбайлас жемқорлыққа қатысты қылмыстық істерді тергеу кезінде өтелген қаражат пайдаланылды. Құрылысы ұзаққа созылған жобаны аяқтауға 150 млн теңге жұмсалды.

Әлеуметтік нысанның құрылысы 2018 жылы басталған, бірақ әртүрлі себептерге байланысты құрылыс-монтаж жұмыстары тоқтап қалған.

Мектеп құрылысы 2022 жылы қайта қолға алынып, биылғы жылдың басында аяқталды.

1979 жылы салынған мектепте білім алған оқушылар енді ең заманауи жағдайлар жасалған, материалдық-техникалық базасы күшейтілген жаңа ғимаратта білім алады.

Сондай-ақ, облыс әкімі жұмыс сапары аясында Ембі қаласындағы 89 пәтерлік көпқабатты үйде жүргізілген күрделі жөндеудің сапасын тексерді.

Мердігер «Қолғанат Құрылыс» ЖШС 1985 жылы салынған үйді 2021 жылы жөндеуге кірісті, 2022 жылдың желтоқсанында жұмыстарды аяқтады.