Абай облысында білім беру ұйымдарының жаңа оқу жылына дайындығы аяқталуға жақын. Мектептер отынмен, оқулықтармен және тасымалдау құралдарымен қамтамасыз етіліп, жылыту жүйелері тексеріліп, қауіпсіздік шаралары күшейтілуде. Білім беру саласының дайындығы мен санитариялық-эпидемиологиялық мониторинг нәтижелері туралы спикерлер Өңірлік коммуникациялар қызметінде өткен брифингте мәлімдеді.

Абай облысының білім басқармасының басшысы Айжан Құрманова өңірдегі 304 мектептің 67-сі орталықтандырылған жылыту жүйесіне қосылғанын, тағы 237 мектеп автономды жылыту жүйелерін пайдаланатынын айтты. Оның ішінде 173 мектеп қатты отынмен, 62 мектеп электр энергиясымен, бір мектеп сұйық отынмен және бір мектеп газбен жылытылады.

Мектептерді заманауи оқу кабинеттерімен жабдықтауға да ерекше көңіл бөлінуде. 2026 жылы 16 мектепке арналған 32 кабинетті сатып алуға 266,4 млн теңге қарастырылған. Бүгінде сегіз кабинет жеткізілді, тағы төрт кабинет бойынша келісімшарттар жасалуда, үш кабинет бойынша ашық конкурс жарияланды. Қалған кабинеттерді жыл соңына дейін сатып алу жоспарлануда.

Оқушыларды жаңартылған оқулықтармен қамтамасыз ету жұмыстары да жалғасуда. 2026–2027 оқу жылында 3 және 7-сыныптарға арналған оқу әдебиеттерін сатып алуға 584 млн 636 мың теңге бөлінді.

Мектебі жоқ елді мекендерден оқушыларды тасымалдау мәселесі де ерекше бақылауда. Күн сайын 121 ауылдық елді мекеннен 3 199 оқушы тасымалмен қамтылған.

Оларды тасымалдауға 109 автобус жұмылдырылған. Оның 94-і мектептердің теңгерімінде болса, 15 автобус жалға алынған.

Оқушылардың қауіпсіздігі де басты бағыттардың бірі болып отыр. Облыстағы 246 орта білім беру ұйымы террористік тұрғыдан осал нысандар санатына жатады. Барлық білім беру ұйымдары 100 пайыз цифрлық бейнебақылау камераларымен, турникеттермен және дабыл түймелерімен қамтамасыз етілген. Қазіргі уақытта камераларды Ұлттық бейнемониторинг жүйесіне қосу жұмыстары жүргізілуде.

Сонымен қатар санитариялық-эпидемиологиялық бақылау мамандары білім беру нысандарының оқу жылын бастауға дайындығын тексерді. Абай облысының санитариялық-эпидемиологиялық бақылау департаментінің басшысы Нұржан Ноғайбаевтың айтуынша, ведомствоның бақылауында барлығы 1014 білім беру нысаны бар.

1 маусым мен 1 шілде аралығында жүргізілген санитариялық-эпидемиологиялық мониторинг аясында мамандар 405 нысанды тексерді. Оның ішінде 309 жалпы білім беретін мектеп, интернат үлгісіндегі сегіз ұйым, кәмелетке толмағандарды бейімдеу орталығы, мектептердегі 87 тамақтану нысаны, сондай-ақ медициналық кабинеттер мен ас блоктары бар.

Осылайша, жаңа оқу жылы басталғанға дейін өңірдегі білім беру ұйымдары бірқатар дайындық жұмыстарын аяқтауы тиіс. Атап айтқанда, оқулықтарды жеткізу, оқу кабинеттерін жабдықтау жұмыстарын аяқтау және анықталған санитариялық талап бұзушылықтарын жою міндеттері тұр.