Сенатор Айнұр Арғынбекова өзінің депутаттық сауалында Еуразиялық экономикалық одақ аясында дәрілік заттар айналымын шамадан тыс реттеу проблемасына назар аударды. Сенатордың пікірінше, ЕАЭО аясында дәрілік заттардың бірыңғай нарығын құру қауіпсіз және сапалы препараттардың қолжетімділігін арттыруға бағытталған, алайда қазіргі кедергілер олардың Қазақстан нарығына шығуын қиындатып отыр.

Депутат өз сөзінде дәрілік заттар мен медициналық бұйымдардың ұлттық тіркелімі және мемлекеттік тізілімін сақтаудың маңыздылығын атап өтті. Ұлттық тіркеу рәсімінен бас тарту еліміздің фармацевтика саласын жағымсыз салдарға әкеп соғуы мүмкін екенін жеткізді.

Сенатордың деректері бойынша, қазіргі уақытта елімізде тіркелген барлық дәрілік заттардың тек 15%-ы ғана ЕАЭО талаптарына сәйкес келтіруге берілген. Ол сондай-ақ 2025 жылға дейін көзделіп отырған өтпелі кезең ұлттық тіркеуді жаңа талаптарға сәйкестендіруде айтарлықтай қиындықтармен қатар жүретінін атап өтті. Оның ішінде бұл ЕАЭО ақпараттық жүйесіндегі кемшіліктерге байланысты, бұл процесті мерзімінде аяқтауда қосымша кедергілер тудырады.

Сенатор сонымен қатар бірыңғай тіркеу куәлігі мен тізілімді енгізу ұлттық қауіпсіздік пен зияткерлік меншікті қорғауға қауіп төндіруі, сондай-ақ отандық фармацевтика өнімін өндірушілерге кері әсерін тигізуі мүмкін деп алаңдаушылық білдірді. Сенатор Арғынбекова осының негізінде Үкіметке ұлттық тіркеу куәлігі мен оларды Қазақстан Республикасының аумағында қолдануға арналған дәрілік заттар тізілімін сақтау туралы мәселені қарауды ұсынды.