«Respublica» партиясы «Назарбаев Зияткерлік мектептері» дербес білім беру ұйымымен және «Ozgerteam» қоғамдық қорымен бірлесіп, JasREPUBLIC CUP аймақтық пікірсайыс турнирін өткізеді. 

Турнирдің мақсаты – ел жастарының зияткерлік қабілеттерін ашу, оқушыларды білімге, тапқырлыққа, шешендік өнерге баулу, жас ұрпақты бірлік пен тұтастыққа ұйыстыра отырып, олардың бойына отансүйгіштік, елжандылық қасиеттерді сіңіру, пікірсайысшы жастарды қолдау және саяси сауатын арттыру. Сондай-ақ, жас азаматтарға өзара тәжірибе және пікір алмасу алаңын ұйымдастыру арқылы оларды қоғамдағы өзекті мәселелерді зерделеуге, шешу жолдары мен тиімді механизмдер ұсынуға, жаңа ойлар мен тың идеяларды айтуға бейімдеу. 

Аймақтық турнирлер 2024 жылғы 28-29-қыркүйек аралығында Астана, Алматы, Шымкент қалалары мен 17 облыста, қазақ және орыс лигалары арасында өтеді. Пікірсайысқа әр өңірден 40 фракция (топ), Астана, Алматы, Шымкент қалаларынан 50 фракция қатысады. Аталған турнир 800-ден астам фракцияны, үш мыңға жуық жастардың басын қосатын болады. 

Дебат халықаралық мектеп пікірсайыс форматында (WSDF) өтеді. 

Аймақтық турнир жеңімпаздары 25 қазан – Республика күніне орай, Астанада өтетін тұңғыш Ұлттық пікірсайыс турниріне қатысады.