Мәжілісте Төтенше жағдайлар министрлігінің қызметі мен даму жоспарлары талқыланды. Экология мәселелері және табиғат пайдалану комитетінде өткен тақырыптық отырысқа комитет төрағасы Еділ Жаңбыршин жетекшілік етті.

Отырысты ашқан Еділ Жаңбыршин жыл сайынғы ірі төтенше жағдайлар, соның ішінде орман өрттері мен су тасқындары мемлекеттік және жергілікті атқарушы органдардың апаттарға дайындығы жеткіліксіз екенін көрсеткенін атап өтті.

– Мысалы, биыл еліміздің 12 өңіріне әсер еткен күрделі су тасқыны болды. Салдарынан мыңдаған тұрғын үй су астында қалды, автожолдар шайылып, көпірлер қирады. Бұл жағдайлар осы салада мәселелердің қордаланып қалғанын, мемлекеттік органдар арасындағы алгоритмнің нашарлығын, материалдық-техникалық базаның әлсіз екенін көрсетті, – деді комитет төрағасы.

 Төтенше жағдайлар министрі Шыңғыс Әрінов ведомство қызметінің «теориядан практикаға» өтуіне байланысты оның бөлімшелерін материалдық-техникалық жарақтандыру және өрт сөндіру бекеттерін салу әдістері қайта қаралғанын айтты.

– Жыл соңына дейін республикалық және жергілікті бюджеттер есебінен, сонымен қатар лизинг шеңберінде 728 бірлік арнайы техника, 18 мыңнан астам керекті жабдықтар сатып алынатын болады. Техниканы бірінші кезекте аудандық бөлімшелердің қажеттіліктері үшін бөлеміз. Алғаш рет 4 ұшақ пен 7 тікұшақты, сондай-ақ көпқабатты ғимараттардағы өртті сөндіру үшін 2 өрт сөндіру дронын және жедел жағдайды бақылауға арналған 10 ұшқышсыз ұшу аппаратын сатып алу жоспарланып отыр, – деді министр.

Шыңғыс Әрінов бүгінде республика бойынша 432 өрт сөндіру бөлімі жұмыс істейтінін, тағы 121 өрт сөндіру депосын салу қажет екенін атап өтті. Тамыз айында елордада жатақханасы бар бірегей өрт сөндіру бекеті ашылды. Ол 3,5 айда заманауи технологияларға сай жылдам салынатын конструкциялардан тұрғызылды. Осыған ұқсас «құрылыс генокоды» барлық өңірде енгізілетін болады.

Биыл Мемлекет басшысы Қасым-Жомарт Кемелұлы Тоқаевтың тапсырмасы бойынша Төтенше жағдайлардың алдын алу комитеті құрылды. Судағы табиғи және техногендік сипаттағы төтенше жағдайларға жедел ден қою үшін алғаш рет «Теңіз жасағы» және төтенше жағдайлар аймақтарында гуманитарлық жүктерді қорғау үшін арнайы «Айбат» бөлімшесі ашылды.

Сейсмикалық қауіпсіздікті қамтамасыз ету тәсілдері де қайта қаралған. Халықты хабарландыру және жер сілкінісі кезіндегі іс-әрекеттерді оқыту жүйесі пысықталды. Алматыда министрліктің жедел мақсаттағы «Алатау» оңтүстік базасы құрылды. Оның аумағында жойқын жер сілкінісі болған жағдайда зардап шеккендерге арналған шатырлы қала орналастырылады.

Осыған орай мәжілісмен Сергей Пономарев министрге базаның орналасқан жері мен жабдықталуы, оның ішінде қорғаныс және тіршілікті қамтамасыз ету құралдары, азық-түлік және басқа да қажетті заттарға қатысты сұрақ қойды. Депутат жер сілкінісі болған жағдайда халық оларды шынымен пайдалана ала ма, жоқ па, соны нақтылады.

 – «Алатау» базасы Түрксіб ауданындағы 173 гектар ашық жерде орналасқан. Жақын жерде кіреберіс жолдар және теміржол желісі бар. Бұған қоса, қазір біз мемлекеттік материалдық резервтің номенклатурасын қарастырып жатырмыз, онда біз міндетті түрде шатырлар, төсек-орындар, бұрын болмаған рюкзактар ​​және басқа да құрал-жабдықтармен қамтамасыз етеміз – мұның барлығы дербес іс-әрекет етуге мүмкіндік береді, – деп жауап берді Шыңғыс Әрінов.

Сондай-ақ депутаттар жауапты мемлекеттік органдардың өкілдеріне су тасқынының алдын алу және болжау, оның зардаптарымен күресу, азаматтық қорғаныс құрылымдарының жай-күйіне қатысты және басқа да сұрақтарын қойды. Мәжіліс депутаттары енгізген ұсыныстарды тиісті комитет жинақтап, Үкіметке жолдайды.