8-9 ақпан күндері Семей қаласында Жақсылық Үшкемпіров атындағы №1 ООРМБСМ-де балалар, жасөспірімдер және жастар арасында Шинкиокушинкай каратэден қала чемпионаты өтті. Қала әкімі Талғат Мұратов жарысты тамашалап, жеңімпаздарды марапаттады. Чемпионат «кумитэ» және «ката» санаттары бойынша 57 салмақта өтіп, 300 спортшы қатысты.

Абай облысы (Семей қаласы) Шинкиокушинкай каратэ федерациясында 5 жастан бастап 1000-нан астам спортшы жаттығады. Толықтай жабдықталған 3 Каратэ орталығы, 15 орта мектеп пен балабақшада, сондай-ақ 20 федерация жаттықтырушысы жұмыс істейтін жеке залдар бар. Федерация тәрбиеленушілері Әлем, Азия, Қазақстан чемпиондары және халықаралық турнирлердің жеңімпаздары.

Біздің спортшыларымыз Шинкиокушинкай каратэден республикалық чемпионатта жоғары нәтиже көрсетіп келеді. Жетістіктері үшін үш спортшыға ҚР спорт шеберлігіне үміткер атағы берілді. Бұл олардың табандылығы мен еңбегінің лайықты марапаты.

Жеңімпаздар мен жүлдегерлер дене шынықтыру және спорт бөлімінің мадақтама грамоталарымен және медальдарымен марапатталды. Шинкиокушинкай каратэ жаттықтырушыларына алғыс хаттар табысталды.

2025 жылы Семей қаласында жаңа «Каратэ орталықтарын» ашу жоспарлануда. Бұл спортты дамыту бағытындағы тағы бір маңызды қадам болмақ.