Бейбітшілік аралын абаттандыру жұмыстары жалғаспақ
Көшпелі кеңес аясында қала әкімі Талғат Мұратов Бейбітшілік аралында болып, мердігерлермен кездесіп, аумақты одан әрі дамытудың негізгі мәселелерін талқылады. Күн тәртібінде абаттандыру, жарықтандыру жүйесін жаңғырту, балалар темір жолын ұзарту және жаңа демалыс аймақтарын салу қаралды.
2024 жылдың қараша айында Бейбітшілік аралында 2 шақырымды құрайтын жаңа балалар темір жолы іске қосылған еді. Үш вагон мен бір тепловоз қызмет көрсететін пойызда 32 орын бар, жалпы сыйымдылығы – 70 адам. Сондай-ақ арал заманауи инфрақұрылыммен жабдықталып, кәсіби спорт, футбол, волейбол және стритбол алаңдары, воркаут аймақтары мен велосипед тұрақтары орнатылды.
«Бейбітшілік аралы тек демалу орны ғана емес, жасыл желек пен табиғаттың ортасы. Қала тұрғындары мен қонақтары үшін ойын алаңдары, серуендеу жолдарының қолайлығы маңызды. Сонымен қатар, жол қауіпсіздігін сақтау мақсатында көлік тұрақтарының орнын бекітіп, барлық жағдайды қарастыруымыз қажет», - деді қала әкімі.
Талғат Мұратов аралдағы ерекше орын этноауылды аралап, қайта жарықтандыру, абаттаныдыру қажеттігін жеткізді. Бүгінде аумақта жаңадан сахна орнатылуда.
Кеңес соңында әкім тиісті бөлім басшыларына тапсырмалар беріп, мердігерлерді бірлесе жұмыс атқаруға шақырды. Аралды абаттандыру жоспары тұрғындардың тынығуы мен қоғамдық шараларға арналған кең әрі ыңғайлы алаңдар құруға бағытталған.