Қазақстан Республикасы Мәдениет және ақпарат министрлігінің қолдауымен, Қазақстанның Дүниежүзілік ЮНЕСКО клубтары мен қауымдастықтары Федерациясы бойынша төрағалығы шеңберінде Алматыда ЮНЕСКО қауымдастықтары мен клубтарының бірінші Жаһандық жастар форумы (GYF) өтіп жатыр.

Алаңға әлемнің түкпір-түкпірінен 150 қатысушы, сондай-ақ мемлекеттік органдардың, ғылым, бизнес өкілдері мен жастар көшбасшылары және ЮНЕСКО-ның жетекші сарапшылары жиналды.

Жобаның негізгі мақсаты – «2025-2030 жылдарға арналған ЮНЕСКО қауымдастықтары мен клубтары жастарының жол картасы: тұрақты болашақты бірге құру» құжатын әзірлеу және бекіту. Аталмыш құжат алдағы жылдарға тұрақты даму мақсаттарын іске асыру арқылы жастардың мүмкіндіктерін арттыруға ықпал етеді.

Форум шеңберінде әлеуетті нығайту, жастардың мүмкіндіктерін арттыру, жасанды интеллектті пайдалану этикасы, цифрлық технологияларды пайдалану, туризм, климаттың өзгеруі, инклюзия және көркем өнер бойынша білім беру сияқты маңызды мәселелер қаралатын болады.