«Семей қаласының орталықтандырылған кітапхана жүйесі» КММ-нің Балалар және жасөспірімдер кітапханасында Нұрғиса Тілендиевтің туғанына 100 жыл толуына арналған «Ұлы күйшінің мұрасы - ұрпаққа аманат» атты еске алу кеші өткізілді.

Шараға ҚР еңбек сіңірген қайраткері, М.Төлебаев атындағы музыкалық училищесінің оқытушысы Серік Рамазанұлы Малаев шәкірттерімен және №4 мектептің 10 сынып оқушылары қатысты.

Шара барысында кітапханашы қазақ композиторы, дирижер, күйші, есімі ұлттық музыка тарихында алтын әріптермен жазылған Нұрғиса Тілендиевтің өмірі мен шығармашылығына кеңінен тоқталып, күйшінің 500-ден астам музыкалық шығармалары халықтық күйге айналып, бірегей фольклорлық-этнографиялық оркестр болып құрылғанын, сонымен қатар оның музыкаға деген сүйіспеншілігі қазақ ұлттық музыкасын әлемге танытып, әндерінің халық арасында танымал болуына себеп болғанын атап өтті.

Әрі қарай, қатысушылар композитордың 70-ші жылдары шыққан әйгілі «Алатау» әнінің жазбасын тыңдап, тарихымен танысты.

Еске алу кешін жалғастырған Серік Рамазанұлы Малаев композитордың адами қасиеттері мен М.Әлімбаев, Қ.Мырза-Әлі, Т.Молдағалиев және М.Мақатаев сынды тағыда басқа көптеген көрнекті ақын-жазушылармен тығыз шығармашылық байланыста болғанына тоқталып, композитордың «Көш керуен», «Ата толғауы», «Аққу», «Әлқиса», «Махамбет» және тағы да басқа күйлері 20-шы ғасырдағы қазақ музыкасының үздік туындылары болып табылатынын, «Құстар әні», «Әсел», «Қазақ вальсі» әндері халықтың жадында мәңгі сақталатынын айтты.

Шараға қатысқан М.Төлебаев атындағы музыкалық училищесінің студенттері композитордың бірнеше танымал күйлерін оқырмандарға  тарту етті. Еске алу кешінде оқырмандар бейнежазба арқылы композитор, ұлы тұлға Нұрғиса Тілендиевтің ұлы, Астана қаласының тұрғыны Алмас Тілендиев пен келіні Галина Дайырбекқызының ұлы маэстроның мұрасы туралы айтқан естеліктері мен «Құстар қайтып барады» әнін тыңдады.

 Шара соңы ұлы композитордың мәдени мұрасын зерделеу, сақтау және насихаттау, ұрпақтан-ұрпаққа жеткізу мақсатында ұйымдастырылған кітап көрмесіне шолу жасаумен аяқталды.