Қала әкімі қар тазалау жұмыстарын сынға алды
Семей қаласы әкімдігінде қала басшысы Талғат Мұратовтың төрағалығымен әкімдік отырысы өтті. Жиналысқа Семей қаласының прокуроры Дәулет Кенжебеков, ТЖБ, құқық қорғау органдарының өкілдері, бөлім және коммуналдық қызмет басшылары қатысты. Күн тәртібінде Семей қаласы аумағынан қар шығару жұмыстары, қоғамдық кеңістіктерді қардан тазалау, қаңғыбас иттердің мәселесі қаралды.
Қаладан қар шығару жұмыстарына 40 бірлік техникаға дейін жұмылдырылуда. Оның ішінде самосвал, тиегіштер, грейдерлер бар. Подгорная, Павлодар, Амбулаторная, Тұрғанбаев, Подхозная, Пархоменко, Сәтбаев, Терешков, Аэропорт, Әуезов көшелерінде қар шығару жұмыстары аяқталған. Дегенмен қазіргі уақытта қар шығару жұмыстарының бәсендігі байқалады.
«Әріптестер, бізде шынымен де уақыт аз, ал жұмыс қарқыны көңіл көншітпейді. Қала үшін қар тазалау мәселесі өте маңызды, сондықтан біз салғырттыққа жол бере алмаймыз. Екі есе күш жұмсап, жұмыстарды қысқа мерзімде аяқтауымыз керек. Жұмыстарды жылдамдату үшін шаралар қабылдау қажет», – деді қала әкімі.
Сондай-ақ әкім қаланың қоғамдық аумақтары мен көшелерін қардан тазалауды жүйелі түрде атқару қажет екенін ескертті. Жұмыстар бәсеңдемеуі үшін мердігерлер толыққанды жауапкершілік алып, қолайсыз ауа райына жедел әрекет етуге дайын болуы керек.
Сонымен қатар, су өткізгіш құбырлардың жағдайына да назар аударылды. Олар мұз бен қардан тазартылып, су тасқынын болдырмау үшін дайын болуы тиіс. Қала басшысы көктемгі су тасқынына дайындық кезінде кемшіліктерге жол берілмеуі керек екенін атап өтті.
Жиын соңында Талғат Мұратов бөлім басшыларына тиісті тапсырмалар беріп, су тасқыны жағдайын алдын алу жұмыстары өзінің жеке бақылауында екенін жеткізді.