Сенаттың Аграрлық мәселелер, табиғатты пайдалану және ауылдық аумақтарды дамыту комитеті Тараз қаласында көшпелі отырыс өткізді. Шара Президенттің «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауын іске асыру аясында ұйымдастырылып отыр.

Су нысандарының көктемгі егіс жұмыстарына дайындығын бағалау – отырыстың негізгі мақсаты болды. Сенаторлар саланы білікті мамандармен қамтамасыз ету деңгейі мен тамшылатып суаруды енгізу және су ресурстарын тиімді пайдалану жөніндегі жобаларды іске асыру барысын сарапшылармен бірге талқылады. Сенаторлар сондай-ақ өткен жылы ашылған Қазақ ұлттық су шаруашылығы және ирригация университетінің қызметімен танысып, саланы дамытудың өзекті мәселелерін зерделеді.

«Суару жүйелерін жаңғырту және білікті маман даярлау – ауыл шаруашылығын дамыту мен өңірдің экономикалық тұрақтылығына тікелей қатысты стратегиялық маңызды міндеттер. Су шаруашылығына кадр даярлауда Жамбыл облысы әрқашан басты рөл атқарып келеді және бүгін біздің алдымызда жаңа қатерлер тұрғаны белгілі. Бізге заманауи су үнемдеу технологиясын енгізу, су ресурстарын тиімді басқару және кадр тапшылығы мәселесін шешу қажет. Ол аграрлық сектордың өнімділігін арттырумен қатар еліміздің ұзақ мерзімді су қауіпсіздігін қамтамасыз етуге мүмкіндік береді», – деп атап өтті Аграрлық мәселелер, табиғатты пайдалану және ауылдық аумақтарды дамыту комитетінің төрағасы Әли Бектаев.

Көшпелі отырысқа қатысушылар су тапшылығының негізгі себептеріне тоқталды. Оның ішінде климаттың өзгеруі, су ресурстарын тиімсіз пайдалану және салада білікті маманға деген сұраныстың арта түсуі. Осыған байланысты су үнемдеу саясатын қалыптастыру, су шаруашылығы инфрақұрылымын жаңғырту, трансшекаралық ынтымақтастықты күшейту және кадр даярлау сапасын арттыру жөнінде нақты ұсыныстар әзірленді.

Депутаттар сондай-ақ Жамбыл облысындағы бірқатар су нысандарын аралап, тамшылатып суару жүйесі жабдығын шығаратын зауыттың, «Тараз былғары аяқ киім» ЖШС, қант зауытының жұмысымен, сондай-ақ жаңғыртудан жұмыстары қолға алынған «Теріс-Ащыбұлақ» су қоймасының қазіргі жағдайымен танысты.

Отырыс қорытындысы бойынша өңірдегі суару жүйелерін жаңғырту, мамандар даярлау және су ресурстарын тиімді басқару жөніндегі нақты ұсыныстар айқындалды.