Қырғыз Республикасының Министрлер Кабинетінің Төрағасы – Президент Әкімшілігінің Басшысы Адылбек Касымалиевтің Қазақстанға жасаған алғашқы ресми сапары аясында екі елдің энергетика саласындағы өзара іс-қимылын дамытуға бағытталған маңызды құжатқа қол қойылды.

Қазақстан Республикасының Энергетика министрлігі мен Қырғыз Республикасының Энергетика министрлігі Қырғызстан аумағында шағын гидроэлектростанциялар (ГЭС) салу бойынша жобаларды жүзеге асыруға арналған Жол картасына қол қойды.

Бұл келісім екі елдің энергетика саласындағы әріптестігін нығайтуға және Қырғызстанның гидроэнергетикалық әлеуетін тиімді пайдалануға мүмкіндік береді. Сондай-ақ бұл Орталық Азия мемлекеттерінің энергетикалық инфрақұрылымды бірлесе дамытуға деген ұмтылысын көрсетеді.

«Қазақстан әрдайым энергетика саласындағы өңірлік ынтымақтастықты қолдайды. Біз мұны бүкіл Орталық Азияның тұрақтылығы мен дамуының кепілі деп санаймыз. Қырғызстанмен Жол картасының қабылдануы – осы бағыттағы ұстанымымыздың айқын дәлелі. Біз өз тәжірибемізбен және ресурстарымызбен бөлісуге дайынбыз, өйткені ортақ күш-жігеріміз энергетикалық тәуелсіз болашақты қалыптастыруға ықпал етеді», – деп мәлімдеді Алмасадам Сәтқалиев.

Шағын ГЭС-тер бойынша Жол картасына қол қойылуы өңірдегі энергетикалық ресурстарды әртараптандыру мен энергия тиімділігін арттыруға бағытталған бастамалардың жалғасы болып табылады. Мұндай жобаларды жүзеге асыру тұрақты электрмен жабдықтауды қамтамасыз етіп қана қоймай, екі ел арасындағы экономикалық байланыстарды да күшейтуге ықпал етеді.