Семейде «Бизнес әйелдер үшін» форумы өтті
Семей әкімдігінің ұйымдастыруымен 8 наурыз – Халықаралық әйелдер күніне орай «Бизнес әйелдер үшін» форумы өтті. Жұмысшы мамандықтар жылы аясында ұйымдастырылған іс-шараға қала әкімі Талғат Мұратов, «Атамекен» Кәсіпкерлер палатасының Абай облыстық филиалының директоры Мақсат Сүйчинов, сондай-ақ кәсіпкер әйелдер қауымы қатысты.
Форум аясында «Әйелдер қолымен жасалған» көрмесі ұйымдастырылып, іскер әйелдердің еңбегі мен табысты кәсіпкерлік жобалары таныстырылды. Бүгінде Семей қаласында 32 мыңнан астам кәсіпкерлік нысан тіркелсе, оның ішінде 15 мыңға жуығы – нәзік жандылар. Бұл жалпы көрсеткіштің 46 пайызын құрайды.
«Нәзік жандылар шағын және орта бизнестен бастап, ірі кәсіпорындарды басқаруда. Қазір басшылық қызметте 2 мыңнан астам әйел еңбек етсе, орта бизнес саласында – 60, ал ірі кәсіпорындарда – 5 әйел басшылық қызмет атқарады. Бұл іскерлік қабілеттеріңіздің, табандылықтарыңыздың айқын дәлелі. Сіздерге зор денсаулық, отбасылық бақыт, табыс пен жаңа жетістіктер тілеймін!», – деді қала әкімі Талғат Мұратов.
Сонымен қатар, Семейде 900-ден астам мейрамхана және қонақүй бизнесі әйелдердің басқаруында. Бұл салада 20 мыңнан астам адам тұрақты жұмыспен қамтылған. Мұндай нәтиже кәсіпкерлік саласының өркендеуіне қосқан зор үлесін көрсетеді.
Форум аясында Талғат Мұратов Абай облысы әкімінің алғыс хаттарын және Семей қаласы әкімінің Құрмет грамоталарын табыстады.