Облыс әкімі Берік Уәли Көкпекті ауданына жұмыс сапары барысында аудан орталығындағы автобекетті жаңғырту жұмысымен танысты.

Автобекет ғимараты 1976 жылы салынған. Бұған дейін қараусыз тұрған нысан қазір жеке инвестордың қаржысы есебінен жөнделіп жатыр. Жоба құны – 55 миллион теңге.

Аудан әкімі Әділет Қожанбаев ғимарат құрылысы екі ай көлемінде аяқталып, пайдалануға берілетінін жеткізді.

Аймақ басшысы тоғыз жолдың торабында орналасқан ауданға автобекеттің аса қажет екенін атап өтіп, құрылысты мерзімінде аяқтауды тапсырды.

Осы жерде облыс әкіміне ауданда жүзеге асыруды жоспарлап отырған инвестициялық жобалар таныстырылды. Олардың қатарында 60 орындық балабақша, 19 адамға арналған қонақүй және стоматологиялық емхана құрылысы бар. Сондай-ақ, аудан орталығын абаттандыру жоспарланған.

Өңір басшысы аудан әкіміне инвестициялық жобаларды іске асыру бағытындағы жұмысты жандандыруды тапсырды.