Мәжіліс спикері Ерлан Қошановтың төрағалығымен жалпы отырыс өтті. Онда депутаттар үш халықаралық құжатты ратификациялады.

Мәжіліс 2007 жылғы 26 маусымдағы Қазақстан Үкіметі мен Азиядағы өзара іс-қимыл және сенім шаралары жөніндегі кеңестің Хатшылығы арасындағы Хатшылықтың Қазақстан аумағында болу шарттары туралы келісімге өзгерістер енгізу туралы хаттаманы ратификациялады. Құжатқа 2024 жылы 15 қарашада Астанада қол қойылған. Оны депутаттарға Сыртқы істер министрінің бірінші орынбасары Ақан Рахметуллин таныстырды.

– Хаттамаға енгізілген өзгерістер БҰҰ және басқа да халықаралық ұйымдардың тәжірибесіне сәйкес, Хатшылыққа жұмысқа жіберілетін немесе келісімшарт негізінде қызмет атқаратын персонал мүшелерінің халықаралық мәртебесін нығайтуды көздейді. Жалпы Азия кеңесі Хатшылығының Қазақстанда болуы шарттары туралы Келісіміне 32 өзгеріс енгізу қарастырылған. Атап айтқанда, олардың 13-і – Хатшылық персоналына «халықаралық азаматтық қызметші» функцияларын беруге қатысты, – деді Ақан Рахметуллин.

Атап айтқанда, Хатшылық персоналының мүшелері, оның ішінде Қазақстан азаматтары, зейнетақы және әлеуметтік төлемдерге салық салудан босатылады. Сонымен қатар хатшылыққа өз қызметін жүзеге асыру үшін қорлар мен басқа да қаржы тетіктерін құру, қызметкерлері үшін зейнетақы және әлеуметтік қамсыздандырудың жеке жүйелерін құру құқығы беріледі.

Жұмыс тобының жетекшісі, депутат Константин Авершин өзінің қосымша баяндамасында құжат қызметкерлердің еңбек жағдайларын халықаралық стандарттарға жақындатып, Кеңесті  толыққанды халықаралық ұйымға айналдыруға оң әсер беретінін, Хатшылық қызметінің әлеуетін одан әрі арттыратынын айтты.

Талқылау қорытындысы бойынша депутаттар хаттаманы ратификациялап, Сенаттың қарауына жіберді.

Сондай-ақ жалпы отырыста 2024 жылғы 27 қыркүйекте Нью-Йорк қаласында жасалған Алматы қаласында АҚШ консулдық мекемесінің ғимаратын салу үшін АҚШ үкіметіне жер телімін жалға беру туралы Қазақстан-Америка үкіметаралық келісім ратификацияланды. Жұмыс тобының жетекшісі Асхат Рахымжанов бұл Америка Құрама Штаттарымен дипломатиялық қарым-қатынастаы одан әрі тиімді дамытуға және нығайтуға бағытталғанын айтты.

Жер учаскесінің ауданы 70593 шаршы метр, жалға алу мерзімі – 49 жыл.  Жалдау ақысы 25,3 миллион АҚШ долларын құрайды және құжат күшіне енген күннен бастап 30 күнтізбелік күн ішінде бірыңғай төлеммен төленетін болады.

Келісімге сәйкес АҚШ үкіметі жалдау ақысын қоспағанда, жер учаскесі мен консулдық ғимаратына салықтар мен басқа төлемдерді төлеуден босатылады. Бұл ретте ол консулдық ғимаратының құрылысына байланысты коммуналдық қызметтерді Қазақстанда қолданыстағы нормативтер мен тарифтерге сәйкес төлей отырып, ғимаратты күтіп-ұстауға және жөндеуге жұмсалған шығыстарды дербес төлеуге міндеттеледі.

Сонымен қатар Мәжіліс Мәжіліс Қазақстан Үкіметі мен Қырғыз Министрлер Кабинеті арасындағы инвестицияларды көтермелеу және өзара қорғау туралы келісімді ратификациялады. Келісімге 2024 жылы 19 сәуірде Астана қаласында қол қойылған.

Сыртқы істер министрінің орынбасары Әлібек Қуантыров келісім инвесторларға құқықтық кепілдіктер беріп қана қоймай, инвестициялық қызметті жүргізу үшін ашық әрі болжамды жағдайларды қамтамасыз ететінін айтады. Ол экспроприациядан қорғау, халықаралық арбитражға қол жеткізу және шетелдік инвестицияларға әділ қарау сияқты маңызды мәселелерді бекітеді.

– Қазақстан – Қырғызстанның үшінші ірі сауда серіктесі. 2024 жылы елдер арасындағы ауар айналымы 1,71 млрд АҚШ долларын құрады, бұл өткен жылмен салыстырғанда 1,5 пайызға жоғары. Бұл біздің экономикалық қарым-қатынасымыздың тұрақтылығын көрсетеді. Қырғызстанмен стратегиялық әріптестік Орталық Азиядағы өңірлік интеграцияны одан әрі дамыту перспективаларын ашады, – деді Ә.Қуантыров.

Жалпы отырыс соңында мәжілісмендер мемлекеттік органдарға әлеуметтік-экономикалық мәселелер бойынша 19 депутаттық сауал жолдады. Олар Мәжілістің ресми сайты мен Telegram-арнасында жарияланды.