Семей қаласының әкімдігі жанындағы әйелдер істері және отбасылық-демографиялық саясат жөніндегі комиссия отырысы өтті. Отырысқа қала әкімінің орынбасары Қуаныш Әбілдаев және комиссия мүшелері қатысты.

Күн тәртібінде оқушыларды ыстық тамақпен қамту, отбасылық құндылықтарды насихаттауға бағытталған мәдени шаралар, кәсіпкер әйелдерді қолдау туралы қаралды.

2024-2025 оқу жылында 51 жалпы білім беретін мектепте ыстық тамақпен қамтамасыз ету 100% құрайды. Қала мектептерінде 1-4 сыныптардан бастап 20 719 оқушы және 5-11 сыныптардан бастап 2 572 оқушы ыстық тамақпен қамтылған. Білім бөлімі жанынан тамақтану сапасына мониторинг жүргізу жөніндегі ведомствоаралық сараптама тобы құрылып, құрамына ата-аналар қоғамдастығының өкілдері, білім бөлімінің қызметкерлері және үкіметтік емес ұйымдар кірді.

Сонымен қатар Семей қаласы бойынша кәсіпкерлік саласында 34 мыңнан астам бизнес субъектісі тіркелсе, оның ішінде кәсіпкер әйелдер 46%-ды құрайды. Бүгінде бизнесті қолдау мен дамытудың мемлекеттік бағдарламалары іске асырылуда: «Бірыңғай кешенді бағдарлама», «Qamqor» аймақтық несие бағдарламасы.

Отырыс соңында қала әкімінің орынбасары Қуаныш Әбілдаев аталған жұмыстар одан әрі жалғасын тауып, қала әкімінің бақылауында екенін жеткізді.