Астана қаласындағы Әлихан Бөкейхан атындағы BINOM school мектеп-лицейінің бастауыш сынып мұғалімі Аружан Жақсыбаева Семей қаласы педагогтерінің дәстүрлі тамыз конференциясы аясында бастауыш сынып мұғалімдеріне арнап шеберлік сағатын өткізді.

«Белсенділік пен икемділік дағдылары: заманауи сабақ формуласы» тақырыбындағы дәріс барысында жас ұстаз жаңа әдіс-тәсілдер мен заманауи білім беру бағдарламаларына негізделген тәжірибесін ортаға салды.

Аружан Жақсыбаева оқушылардың белсенді ойлау қабілетін дамытудың, оқу процесінде икемділік танытудың маңызын атап өтті. Ол практикалық мысалдар келтіріп, оқушылардың қызығушылығын арттыратын әдістемелік тәсілдерді ұсынды.

Сонымен қатар, семинарға қатысқан ұстаздар оқушыларды топтық жұмысқа бейімдеуге және шығармашылық қабілеттерін жетілдіруге бағытталған тапсырмалармен танысты.

Қатысқан ұстаздар шеберлік сағатының мазмұнына жоғары баға беріп, өздерінің оң әсерлерімен бөлісті. Олар бұл тәжірибенің күнделікті сабақ барысында тиімді қолдануға болатын тың идеялар бергенін атап өтті.