Сенатта Конституциялық заңнама, сот жүйесі және құқық қорғау органдары комитетінің кеңейтілген отырысы өтті, онда «Құқық бұзушылық профилактикасы туралы» Заң, сондай-ақ бірқатар заңнамалық актілерге ілеспе өзгерістер мен толықтырулар қаралды.

Отырыс барысында қабылданатын нормалар құқыққа қайшы мінез-құлықтың себептері мен жағдайларын ерте анықтауға, азаматтардың құқықтары мен бостандықтарын қорғауға, сондай-ақ қоғамдық қауіпсіздік пен құқықтық тәртіпті нығайтуға бағытталған құқық бұзушылықтардың алдын алудың біртұтас жүйесін қалыптастыруға бағытталғаны атап өтілді.

Отырысқа қатысушылар маңызды ережелердің ішінде электрлі самокаттарды пайдалануды реттеу мәселесіне жеке тоқталды. Ілеспе түзетулермен заңды тұлғалар мен жеке кәсіпкерлердің жалға беретін электрлі самокаттарды міндетті түрде тіркеу енгізіледі. Бұдан бөлек, жалға берілетін электрлі самокаттар үшін азаматтық-құқықтық жауапкершілікті міндетті сақтандыру белгіленеді және оларды он сегіз жасқа толмаған немесе көлік құралдарын басқару құқығы жоқ адамдардың жолдың жүру бөлігінде пайдалануына тыйым салынады.

Сондай-ақ, қоғамдық орындарда бетті тануға кедергі келтіретін киім заттарын киіп жүргені үшін жауапкершілік енгізу туралы норма талқыланды. Әкімшілік құқық бұзушылық туралы кодекске енгізілген түзетулерге сәйкес, бұл құқық бұзушылық үшін ескерту, ал қайталап жасалған жағдайда айыппұл қарастырылған. Бұл шара құқық бұзушылықтардың алдын алуға және қоғамдық қауіпсіздік деңгейін арттыруға бағытталғаны атап өтілді.

Кеңейтілген отырыс қорытындысы бойынша Комитет мүшелері қаралып отырған заңнамалық өзгерістердің жүйелі сипатта екенін және алдын алу жұмыстарының тиімділігін арттыруға бағытталғанын атап өтті.