Сенатор Ғалиасқар Сарыбаев Бейбітшілік жолындағы көпжақтылық және дипломатия күніне арналған халықаралық дөңгелек үстел отырысына қатысты.

Шара бейбітшілікті және саяси, идеологиялық, экономикалық және діни қарама-қайшылықты реттеудің бейбіт жолдарын нығайту жөніндегі бастамаларды насихаттауға, жанжалдарды шешудің дипломатиялық әдістері мен күрделі әлемдік процестерге ұжымдық тіл табысу тәсілдерін ілгерілетуге бағытталған.

Ғалиасқар Сарыбаев дөңгелек үстелде сөйлеген сөзінде күрделі мәселелерді шешуде көпжақтылық пен дипломатия негізгі құрал болып табылатынын атап өтті.

«Біздің еліміз тәуелсіздік жылдарында халықаралық аренадағы позициясын нығайтты, бейбіт және ашық мемлекет ретінде орнықты. Қазақстан сыртқы саясатта ұлттық мүддені қорғауды және өңірлік қауіпсіздікті қамтамасыз етуде алдын алу тетігін әзірлеуді көздейтін тепе-теңдік бағытын жүргізіп келеді. Біз сенімді әріптес және халықаралық тиімді диалог алаңы мәртебесін тұрақты түрде сақтап келеміз», - деп атап өтті сенатор.

Дөңгелек үстел жұмысына белгілі мемлекет қайраткерлері, халықаралық ұйымдардың басшылары, қазақстандық сарапшылар, еліміздің жетекші жоғары оқу орындарының оқытушылары мен студенттері қатысты.

Суретті түсірген: Б. Серікбай