Семей қаласындағы Назарбаев Зияткерлік мектебінде 9–12-сынып оқушылары арасында «NIS HACKATHON» технологиялық байқауы өтті. Оқушылардың инженерлік және шығармашылық қабілеттерін дамытуға бағытталған байқауға 17 команда қатысты. 

Олар 24 сағат бойы өз идеяларын толыққанды IT-жобаларға айналдыру бағытында жұмыс жүргізіп, жобаларын жетілдіріп, функционалдық модельдерін дайындады. Әр команда 4 адамнан құралды. 

Келесі күні жас зияткерлер өз жобаларын сарапшылар алдында қорғады. Қатысушылар техникалық шешімдердің тиімділігін, жобаның өзектілігін және практикалық маңызын дәлелдеп, сұрақтарға нақты жауап берді.

Әділқазылар алқасының құрамында «Abai IT-Valley» технологиялық кластерінің директоры Бауыржан Наурызбаев, Shakarim University STEM – білім беру жоғары мектебінің аға оқытушысы, PhD Қапан Шакерхан және мектеп ұстазы Жасұлан Амежанов болды. Сарапшылар жобаларды бағалау барысында инновациялық жаңашылдыққа, техникалық орындалуына, командалық үйлесімге және болашақта дамыту әлеуетіне ерекше назар аударды. 

Бас жүлде иегері атанған AllNighters командасы мектеп намысын желілік кезеңде Тараз қаласында қорғайтын болады.