Студент жастар арасында құқықтық және психологиялық сауаттылықты арттыру мақсатында «Қауіпсіз болашақ: сталкингке қарсы ортақ жауапкершілік» тақырыбында ақпараттық-танымдық кездесу өтті. Іс-шараның негізгі мақсаты — сталкингтің жеке тұлғаның қауіпсіздігі мен психологиялық денсаулығына, сондай-ақ қоғамдық тұрақтылыққа төндіретін қауіп-қатерін түсіндіру, жеке шекараны құрметтеу мәдениетін қалыптастыру және бұл әрекеттің зорлық-зомбылықтың бір түрі екеніне қоғам назарын аудару болды.

Кездесу барысында спикерлер гендерлік теңдік пен зорлық-зомбылыққа нөлдік төзімділік қағидаттарының қоғам дамуы үшін маңыздылығын атап өтті. Сонымен қатар, Қазақстан Республикасы Үкіметінің «2026–2030 жылдарға арналған “Қазақстан балалары”» тұжырымдамасы жобасы, мәжбүрлі неке, сталкинг және тұрмыстық зорлық-зомбылық үшін қарастырылған қылмыстық және әкімшілік жауапкершілік мәселелері талқыланды.

Кездесудің маңызды бөлімдерінің бірі «Жоқ» сөзінің мәнін түсіндіруге арналды. Психологиялық шекара, келісім ұғымы және жасырын зорлық-зомбылық түрлері жөнінде түсіндірме беріліп, жастарға жеке қауіпсіздік пен өз құқықтарын қорғаудың маңыздылығы жеткізілді.