Абай облысының Өңірлік коммуникациялар қызметі ұйымдастырған баспасөз туры барысында өңірдегі бірқатар инвестициялық жоба мен шағын кәсіпкерлік бастамалар таныстырылды. Жиында облыстың кәсіпкерлік және индустриялық-инновациялық даму басқармасының басшысы Айбек Рахымбеков инвестициялық ахуал мен әлеуметтік-экономикалық көрсеткіштер жөнінде мәлімет берді.

2025 жылы Өңірлік үйлестіру кеңесінің төрт отырысы өтіп, 30 жобаға қолдау көрсетілген. Бұл шешімдер өңірдің инвестициялық тартымдылығын күшейтті.

Сонымен қатар өндірістік және әлеуметтік бағыттағы жобалар іске қосылды. Шығыс ШПЗ 2 млрд теңгеге OSB плиталарын шығаратын зауыт ашып, 80 адамды жұмыспен қамтыды. Универсал СМ 7,5 млрд теңге инвестиция тартып, көпфункционалды көлік-логистикалық терминал мен «Бақты» трансшекаралық хабты іске қосты — 113 жаңа жұмыс орны құрылды. Ал Алтын ұя 320 орындық балабақша салып, 52 адамды тұрақты жұмыспен қамтыды.

2026 жылдың басында Абай облысында 55,2 мың кәсіпкер тіркелген. Соңғы төрт жыл ішінде жалпы сомасы 351 млн теңге болатын 87 жоба гранттық қолдау алған. Өткен жылы 24 кәсіпкерлік бастама арнайы мемлекеттік қолдауға ие болған.

Сонымен қатар, баспасөз туры кезінде бұқаралық ақпарат құралдарының өкілдері Семей қаласындағы Meirmi кәсіпорнына барып, өндіріс барысын көріп қайтты. Кәсіпорын басшысы Айжан Ботбаева Samsa.kz брендінде сорпа, көкөніс өнімдері және вакуумдық қаптамадағы дайын тағам түрлерін шығарады.

Алдағы уақытта өнім түрін көбейтіп, өндіріс көлемін арттыру көзделген. Өткізу нарығын кеңейту және жаңа жұмыс орындарын ашу да жоспарға енген.

Бұл бастама өңірде шағын және орта бизнесті қолдаудың нақты нәтижесін көрсетеді. Мұндай жобалар жергілікті нарықты отандық өніммен толықтырып, жаңа жұмыс орындарын ашуға және өңір экономикасының өсуіне ықпал етеді.