Мемлекет басшысы Қасым-Жомарт Кемелұлы Тоқаевтың тапсырмасы аясында «Аграрлық несие корпорациясы» АҚ жастарға шағын несие беру бағдарламасы бойынша өтінімдер қабылдауды жалғастыруда. Өтінімдерді қабылдау биылғы жылдың  наурыз айынан басталды және осы аралықта Абай облысы бойынша жас кәсіпкерлерден жеңілдетілген жылдық 2,5 пайызбен микрокредит алуға 86 өтініш келіп түскен.

Атап айтсақ, 71 өтінім мал шаруашылығын, 9 өтініш қызмет көрсету саласын, 3 өтініш сауда, 3 өтініш жеңіл өнеркәсіп саласын қаржыландыру бойынша түскен. 2023 жылы Абай облысы бойынша кемінде 211 несие беру жоспарлануда. Бұл мақсатта 1 млрд. 55 млн. теңге бөлінген. 

Кепіл ретінде республикалық, облыстық маңызы бар қалаларда, аудан орталықтарында, облыстық және аудандық бағынысты қалаларда және өзге де елді мекендерде орналасқан жылжымайтын мүлік, егістік жер және арнайы техника қарастырылады. Қарыз алушыларға қойылатын негізгі талаптардың бірі – несие тарихының жақсы болуы. Өткен екі жылда өтелмеген несие мерзімі 180 күннен аспауы керек. 

Несиені қаржыландыру туралы шешімді облыс әкімдігі жанынан құрылған конкурстық комиссия шығарады. Комиссия жұмысы 26 сәуірден басталды. Бүгін өткен алғашқы отырыста 10 өтініш қаралып, үміткерлер өз бизнес жобаларын таныстырды. Бизнес-жоспарды бағалау парағына сәйкес жоғары ұпай жинаған кәсіпкерлердің жобалары қаржыландырылатын болады.

Комиссияға алғашқы болып жобасын ұсынғандардың бірі Жарма ауданы Аршалы ауылынан келген 25 жастағы кәсіпкер – Қуанышбек Желдібаев.

Абай облысының жұмыспен қамту және әлеуметтік бағдарламаларды үйлестіру басқармасы басшысының орынбасары Айман Нұрлыбектің айтуынша, алдымен, бизнес-жоспарлардың өңірдің әлеуметтік-экономикалық дамуына қосатын үлесі бағаланады. 

Айта кетейік, комиссияның келесі отырысы мамыр айының ортасына  жоспарланған.

Қазіргі уақытта Абай облысы бойынша шағын несие алуға өтінімдер Семей қаласы, Мұхамедханов көшесі, 23 а мекенжайында орналасқан «Аграрлық несие корпорациясы» АҚ-ның Абай облысы бойынша филиалында қабылдануда.