Аймақ басшысы Берік Уәли Бородулиха ауданының Белағаш ауылында салынып жатқан 100 орындық ауылдық клубтың құрылысымен танысты.

Нысан құрылысы 2023 жылы басталған. Қазіргі таңда құрылыс жұмыстарының 90 пайызы орындалған.

Аталған ауылдық округте осы уақытқа дейін мәдениет нысаны болмаған. Осыған байланысты жергілікті кәсіпкердің бастамасымен клуб құрылысы қолға алынған. Алайда нысанды мемлекет теңгеріміне сатып алу мәселесі түбегейлі шешілмей, қаржыландырудың болмауы құрылыс қарқынына әсер еткен. Қазіргі таңда жобаны аяқтау үшін 300 миллион теңгеден астам қаржы қажет. Бұл қаражатқа музыкалық жабдықтар, сахналық костюмдер, жиһаздар сатып алу және ғимаратта қарастырылған учаскелік полиция пунктін толық жарақтандыру жұмыстары да кіреді.

Облыс әкімі ауыл тұрғындары үшін аса қажет нысанның құрылысын аяқтап, пайдалануға беру қажеттігін айтты.

Жалпы, Бородулиха ауданында бір аудандық мәдениет үйі, алты округтік мәдениет үйі және төрт ауылдық клуб жұмыс істейді.