Ағымдағы жылдың 14 мамыр күні Абай облысының Дін істері басқармасының ұйымдастыруымен Діни бірлестіктер басшылары клубының екінші отырысы өтті. Кездесудің негізгі мақсаты – конфессияаралық келісімді нығайту, қоғамдық өзекті мәселелерді шешуде діни бірлестіктер арасындағы әріптестік пен өзара іс-қимылды дамыту.

Отырыс барысында басқарма басшысы Сейілбек Әбиұрұлы Ысқақов қоғамдағы бірлік пен толеранттылықты нығайтудың маңыздылығына тоқталып, жастарды діни радикализм мен жалған идеологиялардың ықпалынан қорғау қажеттігін ерекше атап өтті. Сонымен қатар, өзара сыйластық пен төзімділік қағидаттарын дәріптеудің маңызына назар аударды.

Кездесу аясында Дін мәселелерін зерттеу орталығының директоры Мақсат Өмірханов баяндама жасап, діни бірлестіктердің қоғамда парасаттылықты, ізгілікті және моральдық жауапкершілікті насихаттауда маңызды рөл атқаратынын айтты.

Шара барысында конфессияаралық татулықты сақтау, қоғамдағы тұрақтылықты нығайту және ортақ құндылықтарды дәріптеу бағытындағы бірлескен жұмыстар талқыланды. Кездесу өзара ынтымақтастықты арттыруға және қоғамдық келісімді нығайтуға бағытталған маңызды алаңға айналды.