Абай облысында суға шомылу маусымындағы қауіпсіздік мәселесі талқыланды
Бүгін облыс әкімі Берік Уәлидің төрағалығымен өткен әкімдік отырысында шомылу маусымы кезеңінде азаматтардың қауіпсіздігін қамтамасыз ету мәселесі қаралды.
Қазір облыстағы су айдындарында бұқаралық демалыс, туризм және спорт үшін 21 орын белгіленген. Оның ішінде 15 коммуналдық жағажай, 2 жеке жағажай және 4 жаппай демалыс аймағы бар.
Былтыр облыстың су айдындарында 12 адам, оның ішінде 4 бала суға батып қайтыс болған. Мамандардың мәліметінше, қайғылы жағдайлардың басым бөлігі қауіпсіздік талаптарын сақтамау, мас күйінде суға түсу және балаларды қараусыз қалдыру салдарынан болып отыр.
Шомылу маусымына дайындық аясында Алакөл жағалауында құтқару станциясы ашылған. Сонымен қатар, халық көп жиналатын орындарда патрульдеу жұмыстары күшейтіліп, 30 жаяу және 16 мобильді бекет қойылады. Бұл жұмыстарға төтенше жағдайлар департаменті мен әскери бөлімнің 100-ден астам қызметкері жұмылдырылады.
Сондай-ақ су айдындарында оқу-жаттығулар өткізу, су түбін тазарту, қауіпті аумақтарға ескерту белгілерін орнату және халық арасында түсіндіру жұмыстарын күшейту жоспарланып отыр.
Жиында Алакөл көліндегі шағын көлемді кемелер үшін арнайы пирстер орнату, жағалаудағы бейнебақылау жүйесін кеңейту, сондай-ақ Семей қаласындағы жабдықталмаған жағажайларды ретке келтіру мәселелері де көтерілді.
Облыс әкімі қала және аудан әкімдеріне шомылу маусымындағы қауіпсіздік шараларын күшейтуді, жабдықталмаған жағажайларды бақылауға алып, ресми демалыс орындарының санын арттыру мәселесін қарастыруды тапсырды. Сондай-ақ туристік аймақтардың қауіпсіздігі мен инфрақұрылымына талдау жүргізуді, шағын көлемді кемелердің қауіпсіздігін қатаң бақылауды жүктеді.
Бұдан бөлек «Таза Қазақстан» республикалық бағдарламасының жүзеге асу барысы да айтылды. Оның аясында 16 мамыр күні облыстың барлық елді мекендерінде санитарлық тазалық жұмыстары ұйымдастырылды. Сенбілікке 15 мыңнан астам тұрғын қатысып, 471 ұйым мен 204 техника жұмылдырылды. Нәтижесінде 1651 аула, 79 саябақ пен сквер аумағы тазартылып, 3342 тонна қоқыс шығарылды. Сонымен қатар, биыл облыс аумағында 67 мың көшет отырғызу жоспарланса, қазір оның 52 мыңнан астамы егілді.