«Жаңару» сыбайлас жемқорлыққа қарсы жалпыұлттық қозғалысы» республикалық қоғамдық бірлестігінің Абай облыстық филиалының ұйымдастыруымен қалалық шағын футбол турнирі өтті.

Іс-шараның мақсаты – қоғамда адалдық пен парасаттылық құндылықтарын дәріптеу, сыбайлас жемқорлыққа қарсы мәдениетті қалыптастыру және салауатты өмір салтын насихаттау.

Турнирге мемлекеттік органдардың, қоғамдық ұйымдардың және өзге де мекемелердің командалары қатысып, айналмалы жүйе бойынша бақ сынады. Тартысты өткен жарыс қорытындысы бойынша бірінші орынды «Семей Банк ЦентрКредит» командасы иеленді. Екінші орынға «Саналы ұрпақ» волонтерлер клубының командасы тұрақтаса, үшінші орынды Мемлекеттік қызмет істері агенттігінің Абай облысы бойынша департаментінің Сыбайлас жемқорлықтың алдын алу басқармасы мамандарынан құралған команда жеңіп алды.

Жарыс жеңімпаздары мен жүлдегерлері арнайы кубоктармен, медальдармен және грамоталармен марапатталды.

Мұндай іс-шаралар қоғамда адалдық пен әділдік қағидаттарын нығайтуға, азаматтардың құқықтық мәдениетін арттыруға және салауатты өмір салтын кеңінен насихаттауға ықпал етеді.