ҚР Ғылым және жоғары білім министрлігі арнайы жоғары оқу орындарының халықаралық ынтымақтастығын дамыту, академиялық байланыстарды кеңейту және кадрлар даярлауға заманауи тәсілдерді енгізу бағытындағы жұмысты жалғастырып келеді.

ҚР Бас прокуратурасының жанындағы Құқық қорғау органдары академиясы Еуропалық құқық және басқару университетімен (ELGU) ынтымақтастық туралы келісім жасасты. Келісім аясында бірлескен білім беру бағдарламаларын, оның ішінде қос дипломды бағдарламаларды іске асыру, академиялық ұтқырлықты дамыту және тағылымдамалар ұйымдастыру көзделген.

Қол жеткізілген уағдаластықтар шеңберінде Академияның 20 магистранты мен докторанты ELGU-да тағылымдамадан өтеді. Тараптар сондай-ақ Академия базасында ELGU филиалын ашу мүмкіндігін қарастырды.

Ынтымақтастықтың тағы бір бағыты – Академия базасында Еуропалық жария құқық ұйымының (EPLO) орталығын құру. Орталық бірлескен ғылыми зерттеулер жүргізуге, халықаралық және гранттық жобаларға қатысуға, сондай-ақ құқық қорғау және мемлекеттік органдардың қызметкерлерін даярлау және қайта даярлауға бағытталады. Басым бағыттардың қатарында киберқауіпсіздік, жасанды интеллектіні қолдану және трансұлттық ұйымдасқан қылмысқа қарсы іс-қимыл бар.

Халықаралық ынтымақтастық ҚР Ішкі істер министрлігінің Басқару академиясында да дамып келеді. 2026 жылғы қыркүйекте Академия базасында Үндістанның Гандинагар қаласындағы Ұлттық сот ғылымдары университетімен (NFSU) бірлесіп қос дипломды білім беру бағдарламасы іске қосылды.

Бағдарлама киберқауіпсіздік, цифрлық криминалистика, сот сараптамасы және қылмыстық істерді қолданбалы тергеу сияқты сұранысқа ие бағыттар бойынша кадрлар даярлауды көздейді.

Халықаралық серіктестікті дамыту арнайы жоғары оқу орындары үшін қосымша мүмкіндіктер қалыптастырып, тәжірибе мен білім беру тәжірибелерімен алмасуға, сондай-ақ білім алушылар мен қызметкерлердің халықаралық білім беру және ғылыми-зерттеу мүмкіндіктеріне қолжетімділігін кеңейтуге ықпал етеді.