«Жол активтері сапасының ұлттық орталығы» ШЖҚ РМК Абай облыстық филиалы 2026 жылдың басынан бері өңірдегі жол құрылысы және жөндеу нысандарына кешенді бақылау жүргізіп келеді. Атқарылған жұмыстардың нәтижесінде жол сапасының көрсеткіші өткен жылмен салыстырғанда 1,5 есеге артқан.

Жыл басынан бері филиал мамандары белгіленген 47 нысанға 442 рет барып, жоспарланған жұмыстарды 100% сапа сараптамасымен қамтыды.

Зертханалық тексеру үшін 1409 сынама алынды. Оның 115-і, яғни 8 пайызы нормативтік-техникалық құжаттама талаптарына сәйкес келмеген. Қазіргі таңда талапқа сай болмаған сынамалардың 34-і қайта қалпына келтірілді.

Сонымен қатар, анықталған 47 ақаудың 29-ы немесе 62 пайызы толық жойылды. Қалған ақаулар нысандар пайдалануға берілгенге дейін Көлік министрлігі бекіткен әдістемелік ұсынымдарға сәйкес қалпына келтіріледі.

Филиал мамандары облыстық Жолаушылар көлігі және автомобиль жолдары басқармасымен бірлесіп, өңірдегі 22 асфальтбетон зауытына тексеру жүргізді. Тексеру барысында өндірілетін асфальтбетон қоспаларының сапасы зерттеліп, тиісті мәліметтердің барлығы Жол-құрылыс материалдарының бірыңғай базасына енгізілді.