Туған жерінен түлеп ұшып, ғылым мен әдебиет саласында өзіндік қолтаңбасын қалыптастырған көрнекті тұлға, жазушы, ғалым, абайтанушы, алаштанушы, мұхтартанушы, профессор Тұрсын Жұртбайдың 75 жылдық мерейтойына орай «Ғалым ғұмыры – ұлт қазынасы» атты салтанатты кеш ұйымдастырылды. Ғалымның мерейлі жасына арналған тағылымды шара туған топырағында өтіп, оның ғылым мен руханиятқа сіңірген еңбегіне құрмет көрсетілді.

Ғұмырын ұлт тарихын түгендеуге, әдеби мұраны зерттеуге және қазақ руханиятының құнды қазыналарын зерделеуге арнаған Тұрсын Құдакелдіұлының еңбегі – отандық ғылым үшін айрықша маңызға ие. Ол саналы ғұмырында Абай мен Мұхтар Әуезовтің шығармашылық әлемін, Алаш қайраткерлерінің мұрасын зерттеп, ұлт тарихындағы ақтаңдақтарды ашуға елеулі үлес қосты. Ғалымның ғылыми ізденістері мен қаламгерлік еңбектері қазақ әдебиеті мен тарихын тереңірек тануға жол ашып, кейінгі зерттеушілер үшін маңызды рухани мұраға айналды.

Осындай ұлт руханиятына өлшеусіз үлес қосқан азаматтың мерейтойын туған жерінде атап өту – ел үшін де, жерлестері үшін де ерекше мәнге ие. Салтанатты кешке жиналған қауым ғалымның өмір жолы мен шығармашылық еңбегіне тоқталып, оның ел тарихы мен мәдениетін зерттеудегі қажырлы қызметін кеңінен дәріптеді.

Мерекелік жиында аудан әкімі Мейіржан Серікбосынұлы сөз сөйлеп, мерейтой иесін 75 жасқа толған мерейлі белесімен құттықтады. Өз сөзінде аудан басшысы Тұрсын Құдакелдіұлының ел руханиятына сіңірген еңбегіне, ғылым жолындағы ізденістері мен қаламгерлік қызметіне ерекше тоқталды. Сондай-ақ туған жердің атын асқақтатып, қазақ ғылымының дамуына үлес қосып жүрген тұлғаның еңбегі әрдайым құрметке лайық екенін атап өтті.

Салтанатты шара барысында мерейтой иесіне аудан атынан арнайы сый-құрмет көрсетіліп, еңбегінің белгісі ретінде «Ел алғысы» төсбелгісі табысталды. Бұл – ғалымның ұзақ жылдар бойы ғылым мен руханият жолында атқарған қызметіне, туған ел алдындағы еңбегіне көрсетілген құрметтің айғағы.

Кештің жалғасында ауданның ел ағалары сөз алып, мерейтой иесіне ақжарма тілектерін жеткізді. Олар туған жерден түлеп ұшқан азаматтың ғылымдағы жетістіктерін, ұлт тарихын зерттеудегі табанды еңбегін және кейінгі ұрпаққа қалдырған мол мұрасын ерекше атап өтті. Сонымен қатар ғалымның өнегелі өмір жолы мен шығармашылық ізденістеріне тоқталып, алдағы уақытта да ел игілігі жолындағы еңбегінің жемісті болуына тілектестік білдірді.

Туған жердің төрінде ұйымдастырылған мерейтойлық басқосу тек құттықтаулар мен марапаттауларға ғана емес, рухани тағылымға толы мазмұнды кешке ұласты. Ғылым мен әдебиеттің, тарих пен мәдениеттің сабақтастығын дәріптеген шарада Тұрсын Жұртбайдың еңбегі арқылы ұлт мұрасын зерттеудің және оны келер ұрпаққа жеткізудің маңызы тағы бір мәрте айқындалды.

Мерекелік бағдарламаның көркемдік бөлімі «Қаламқас» халық ән-би ансамблінің концертімен жалғасты. Өнер ұжымы әсем ән мен мың бұралған биді үйлестіре отырып, кештің мазмұнын байытып, жиналған қауымға көтеріңкі көңіл күй сыйлады. Осылайша, ғылыми орта өкілдері мен ел азаматтары бас қосқан салтанатты жиын өнер мен руханият тоғысқан мерекелік кешке айналды.

Өз кезегінде мерейтой иесі Тұрсын Құдакелдіұлы туған жерінен келген ыстық ықыласқа ризашылығын білдірді. Арнайы ұйымдастырылған тағылымды кештің мән-маңызына тоқталып, құрмет көрсеткен жерлестеріне шынайы алғысын жеткізді. Туған топырақта көрсетілген сый-құрметтің орны бөлек екенін атап өтіп, мерейтойға ортақтасқан барша азаматқа ізгі тілегін арнады.

Жалпы, «Ғалым ғұмыры – ұлт қазынасы» атты мерейтойлық кеш – ғылым мен руханиятқа ғұмырын арнаған тұлғаның еңбегін ұлықтаған, туған жер мен перзент арасындағы рухани байланысты айшықтаған тағылымды басқосу болды.

Тұрсын Жұртбайдың 75 жылдық мерейтойын туған жерде атап өту – бір азаматтың мерейлі жасын тойлау ғана емес, ұлт тарихын түгендеп, Алаш мұрасын зерттеп, Абай мен Мұхтар әлемін зерделеуге ғұмырын арнаған ғалымның еңбегіне көрсетілген құрмет. Ғалымның өнегелі жолы мен артында қалдырған мол мұрасы кейінгі ұрпақ үшін рухани бағдар болып қала бермек.