Тарихи мұраны сақтау – өткенге құрмет қана емес, келер ұрпақ алдындағы жауапкершілік. Осы мақсатта аудан орталығынан 15 шақырым қашықтықта орналасқан Айпара ана қорымында абаттандыру және жөндеу жұмыстары жүргізілді.

Тарихын таныған ел ғана рухани тамырын тереңге тартады. Ата-баба аманатын ардақтап, өткеннің өнегесін келешекке жеткізу – ұрпақ сабақтастығының маңызды көрінісі. Осы тұрғыдан алғанда, өңір тарихында өзіндік орны бар Айпара ана қорымының абаттандырылуы – тағылымы мол игі бастамалардың бірі.

Аудан орталығынан 15 шақырым жерде орналасқан тарихи орын – өңірдің рухани мұрасын бойына сіңірген қасиетті мекендердің бірі. Қорымның тарихи-мәдени маңызын ескерген Олжай ұрпақтары бірлесе отырып, оның аумағында абаттандыру және жөндеу жұмыстарын жүргізді. Бұл бастаманың негізгі мақсаты – тарихи орынды күтіп ұстау, ата-баба мұрасын сақтау және келешек ұрпаққа аманат ету.

Осыған орай аудан әкімі Мейіржан Серікбосынұлы зиялы қауым өкілдерімен және Олжай ұрпақтарымен бірге Айпара ана қорымына арнайы барып, ата-баба рухына Құран бағыштады. Тағылымды басқосу барысында тарихи мұраны ұлықтау, өткенді ұмытпай, кейінгі буынға жеткізудің маңызы көрініс тапты.

Жиынның маңызды сәттерінің бірі – «Айпара ана» тарихи-танымдық кітабының тұсаукесері болды. Журналист, өлкетанушы Әсет Мырзақасым құрастырған жинаққа әр кезеңде жазылған тарихи зерттеулер мен естеліктер, шежірелік деректер, сондай-ақ Айпара анаға арналған көркем туындылар топтастырылған. Кітаптың жарық көруі тарихи тұлғаға қатысты деректерді бір арнаға жинақтап, рухани мұраны кеңінен танытуға мүмкіндік береді.

Тағылымды шара соңында қорымда жерленген 130-дан астам марқұмның және ата-бабалардың рухына Құран бағышталып, қатым түсірілді.

Айпара ана қорымының абаттандырылуы мен тарихи-танымдық кітаптың жарық көруі – өткенге тағзым мен рухани мұраны сақтау жолындағы өзара сабақтас бастамалар. Өйткені тарихи орындарды күтіп ұстау ғана емес, сол мекендерге қатысты деректерді жинақтап, ел жадында жаңғырту да маңызды. Ата-баба аманатына адалдық таныту – ұрпақтың өткен алдындағы парызы.